İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 110 Hüküm no: 53 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mercan v. Asvador’ın Hacı Mustafa’ya sahtiyan parasından borcu olduğunu kabul ettiği Mahmiye-i İstanbul’da Tarsus mahallesi sâkinlerinden bâ‘is-i hâze’l-kitâb Hac[ı] Mustafa b. el-Hâc Osman nâm kimesne meclis-i şer‘-i şerîfde Mercan v. Asvadur nâm zimmî muvâcehesinde üzerine da‘vâ ve takrîr-i kelâm edip mezbûr Mercan bundan akdem yedimden iştirâ ve kabz eylediği adedi beynimizde ma‘lûm sahtiyan semeninden zimmetinde beş yüz akçe hakkım olmağla suâl olunup mezbûrun mezbûr Mercan’dan alıverilmesi matlûbumdur dedikde gıbbe’s-suâl mezbûr Mercan cevâbında fi’l-hakīka kaziyye minvâl-i muharrer üzre olup müdde‘î-i mezbûrun yedinden iştirâ ve kabz eylediğim adedi beynimizde ma‘lûm sahtiyan semeninden zimmetimde beş yüz akçe deynimdir deyû ikrâr ve i‘tirâf etmeğin mûcebince müdde‘î-i mezbûr Hacı Mustafa’ya meblağ-ı mezbûr beş yüz akçeyi edâ ve teslîme merkūm Mercan’a tenbîh olunmağın mâ vaka‘a bi’t-taleb ketb olundu. Fi’l-yevmi’t-tâsi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Hacı Mustafa Çelebi b. Tevekkül, İbrahim Çelebi b. Mehmed, Veli Beşe b. Mahmud, İbrahim Çelebi b. Ahmed ve gayruhüm mine’l-hâzırîn.