İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 110 Hüküm no: 52 Orijinal metin no: [14a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Ali Ağa’nın kölesi Rıdvan’ı azat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlde[n] Mevlânâ Ömer Efendi b. İsmail irsâl olunup ol dahi umdetü’l-muhadderât Fâtıma Hâtun bt. Ali Ağa’nın mahmiye-i İstanbul’da Kazasker Mehmed Efendi mahallesinde vâki‘ menziline varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde müşârün-ileyhâ Fâtıma husûs-ı câ’i’l-beyâna vekîl olup zâtı ma‘rifet-i şer‘iyye ile ârife mahalle-i mezbûre sâkinlerinden Hızır Beşe b. Abdülfettâh ve neccâr Osman Beşe b. Kasım nâm kimesneler şehâdetleri ile şer‘an vekâleti sâbite olan umdetü’l-akrân Odabaşı Ali Hamza Beşe b. Ali nâm kimesne meclis-i ma‘kūd-ı mezbûrda bi’l-vekâle ikrâr ve takrîr-i kelâm edip müvekkilem müşârün-ileyhâ Fâtıma Hâtun kendiye rıkkını mu‘terif olan açık kaşlı gök gözlü orta boylu Rûsiyyetü’l-asl bâ‘is-i hâze’l-kitâb Rıdvan b. Abdülvahhab nâm abd-i memlûkümü, hasbeten li’l-hallâk ve taleben li rızâ’i(…) [14b] tahrîr ve i‘tâk ve zümre-i ahrâr-ı asliyyîne ilhâk eyledi ba‘de’l-yevm mevsûf-ı mezbûr Rıdvan sâir ahrâr-ı asliyyîn gibi hür olup üzerinde müvekkile-i müşârün-ileyhâ Fâtıma Hâtun’un hakk-ı velâ’-i şer‘îden mâ‘adâ hakkı kalmadı dedikde husûs-ı mezkûru Mevlânâ-yı mezbûr mahallinde tahrîr, ba‘dehu ma‘an irsâl olunan Hasan Çelebi b. Bayram ve Mehmed Çelebi b. Abdullah ile meclis-i şer‘-i hatîre gelip alâ vukū‘ihi inhâ ve takrîr eylediklerinde mâ hüve’l-vâki‘ bi’l-ibtigā ketb olundu. Fî evâhiri’l-muharremi’l-harâm li sene seb‘a ve semânîn ve elf. Şuhûdü’l-hâl: Odabaşı Yusuf Beşe b. Osman, Osman Çavuş b. ( ), Ali Beşe b. Mehmed, Mehmed Beşe b. Abdülfettâh, es-Seyyid Mustafa Çelebi el-kasab ve gayruhüm mine’l-hâzırîn.