İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 112 Hüküm no: 57 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayasofya-i Kebir Vakfı’ndan Hoca Hayreddin mahallesindeki nalçacı dükkânının Mehmed Bey tarafından kiraya verildiği Mahmiye-i İstanbul’da hısnı ebvâbından Fenerkapısı dâhilinde Camcı mahallesinde sâkin Mehmed b. Abdullah nâm kimesne meclis-i şer‘-i şerîf-i lâzımü’t-teşrîfde, sâbıkan mahmiye-i merkūmede mesned-ârâ-yı şerî‘at-i garrâ olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l fezâ’il ve’l-me‘âlî metbû‘ü’l-efâzıl ve’l-e‘âlî sa‘âdetlü Mehmed Efendi hazretleri bâhirü’ş-şereflerinde husûs-ı âti’l-beyâna vekîl olduğu nehc-i şer‘î ve tarîk-i mer‘î ile sâbit olan bâ‘isü’l-vesîka Mehmed Bey b. Hüseyin nâm kimesne mahzarında ikrâr ve takrîr-i kelâm edip Ayasofya-i Kebîr vakfından olup icâreteyn-i ma‘lûmeteyn ile müvekkil-i mûmâ-ileyh hazretlerinin taht-ı tasarrufunda olup Unkapanı dâhilinde Hoca Hayreddin mahallesinde vâki‘ hâneye muttasıl lede’l-ahâlî ve’l-cîrân ma‘lûmü’l-hudûd nalçacı dükkânını vekîl-i mezbûr Mehmed Bey her otuz günde yüz ikişer akçeye olmak üzre târih-i kitâb Safer’i gurresinden bir sene tamâmına değin bin sekiz yüz akçeye bi’l-vekâle bana îcâr, ben dahi minvâl-i muharrer üzre istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Es-Seyyid Mustafa Çelebi b. Ali, el-Hâc Mehmed b. Hüseyin, el-Hâc Ahmed b. Mehmed, İbrahim b. Mahmud, Mehmed Efendi b. Mehmed ve gayruhüm mine’l-hâzırîn.