İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 113 Hüküm no: 58 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halime bt. el-Hâc Ferhad’ın Beşiktaş’taki çiftliğini oğlu el-Hâc Ahmed’e sattığı Mahrûse-i Galata müzâfâtından kasaba-i Kasımpaşa’da el-Hâc Şaban mahallesi sâkinlerinden Halime bt. el-Hâc Ferhad nâm hâtunun sadrî oğlu ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sükkânından Ali Ağa b. Abdi ve Kara İmâm mahallesi sâkinlerinden Hüseyin Bey b. Mustafa nâm kimesneler şehâdetleri ile şer‘an sâbit olan İbrahim Çelebi b. Ali nâm kimesne meclis-i şer‘-i şerîf-i enverde bâ‘is-i hâze’l-kitâb el-Hâc Ahmed b. Mehmed nâm kimesne mahzarında ikrâr ve takrîr-i kelâm edip vâlidem müvekkilem merkūm[e] Halime Hâtun’un akd-i âti’z-zikrin sudûruna değin yedinde mülkü olup mahrûse-i mezbûre a‘mâlinden kasaba-i Beşiktaş bağları hilâlinde vâki‘ bir tarafdan ba‘zan Ali Bey ve bir tarafdan ba‘zan Ebûbekir Bey tarlaları ve bir tarafdan ba‘zan Balmumcu Dimo ve ba‘zan Papak oğlu nâm zimmîler bağları ve bir tarafdan ba‘zan Mehmed Efendi ve ba‘zan Ali Kethüdâ bağları ve bir tarafdan tarîk-i âm ile mahdûd fevkānî on üç bâb ve tahtında üç bâb mahzen ve bir samanhâne ve bir anbar ve ahırı ve kenîfi ve bi’r-i mâyı ve sarnıcı ve zât-ı eşcâr-ı müsmire ve gayr-ı müsmire bir kıt‘a bahçe ve yedi kıt‘a bağı [ve] dört su kuyusu müştemil çiftlik ta‘bîr olunur menzili, bi cümleti’t-tevâbi‘ ve’l-levâhık ve menzil-i mezbûr içinde olan on yedi dikel ve on çapa ve dokuz orak ve bir balta ve bir demir kürek ve bir bel ve iki sapan demiri ve iki tahra ve iki kasatura ve iki yaba ve bir el döğeni ve bir tarla tarağı ve iki döğen ve bir sarı sakallı orta boylu Rûs[iyy]ü’l-asl Merd nâm abdi ve beş inek ve altı buzağı ve iki öküzü bi safkatin vâhide merkūm el-Hâc Ahmed’e tarafından îcâb ve kabûlü hâvî bey‘-i kat‘î ile sekiz yüz esedî guruşa bi’l-vekâle bey‘ ve teslîm ettiğinden sonra semen-i mezbûr sekiz yüz guruşun yedi yüz elli guruşunu nakid bana edâ ve teslîm edip ve elli guruşu mukābelesinde Ayasofya vakfından icâr-ı mu‘accele ve ayda on beş akçe icâre-i müeccele ile taht-ı tasarrufunda olup Mahmiye-i İstanbul’da Saraçhâne dâhilinde vâki‘ lede’l-ahâlî ve’l-cîrân ma‘lûmü’l-hudûd bir bâb sarrâc dükkânının tasarrufunu izn-i mütevellî ile bana ferâğ ve tefvîz ve takās, ben dahi bi’l-vekâle meblağ-ı mezbûr yedi yüz elli guruşu kabz ve teslîm ve dükkân-ı mezbûru tefevvüz ve mukāssa ve kabûl eyledim min ba‘d zikr olunan çiftlik içinde olan eşyâ ve abd ve devâb merkūm el-Hâc Ahmed’in emlâki müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve’t-tahlîfi’ [15b] l-mer‘î mâ vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Hüseyin b. Mustafa, el-Hâc Mahmud b. Mustafa, Ali b. Abdullah, Ahmed b. Mehmed, Ali b. Mehmed, Yahya Efendi b. Mehmed, Süleyman b. Hasan, Süleyman b. İbrahim, Takyecizâde Ahmed b. Mustafa, Hasan b. Şükrü, Mustafa Bey b. Mehmed ve gayruhüm.