İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 124 Hüküm no: 70 Orijinal metin no: [17b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Lambo’nun Yani v. Panayot’taki alacağında sulhe varıldığı Mahmiye-i İstanbul’da Kumkapı kurbunda Süleyman Ağa mahallesi sâkinlerinden Dimo v. Lambo nâm zimmî meclis-i şer‘-i şerîfde bâ‘is-i hâze’s-sifr Yani v. Panayot nâm zimmî muvâcehesinde ikrâr ve takrîr-i kelâm edip mezbûr Yani’ye târih-i kitâbdan iki sene mukaddem üç bin üç yüz altmış akçemi sana ikrâz ve teslîm sen dahi iktirâz ve tesellüm ve kabz etmiş idin deyû bundan akdem mezbûr Yani’den da‘vâ ve taleb ettiğimde ol dahi inkâr etmekle beynimizde münâza‘ât-ı kesîre ve muhâsamât-ı şedîde vâki‘a olmuşdu. El-hâletü hâzihî beynimizde muslihûn tavassut edip mezbûr Yani ile beynimizde iki bin sekiz yüz altmış akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr iki bin sekiz yüz altmış akçeyi tamâmen yedinden ahz u kabz eyledim ba‘de’l-yevm husûs-ı mezbûra müte‘allika âmme-i da‘vâdan mezbûr Yani’nin zimmetini ibrâ’-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, [18a] Veli Bey b. Mahmud, Mehmed b. Mehmed, Ebûbekir b. Hüseyin, Hristo v. Dimo, Yorgi v. Yani, Yorgi v. Dimo, Yorgi v. Papa Dimo.