İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 123 Hüküm no: 69 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Saatçizâde Mustafa Çelebi’nin alacakları için vasîsi Mehmed Efendi tarafından Mehmed Çelebi’nin vekil tayin edildiği Mahmiye-i İstanbul’da Cebecibaşı mahallesinde sâkin iken bundan akdem vefât eden Saatçizâde demekle şehîr Mustafa Çelebi nâm müteveffânın zimem-i nâsda olan hukūkunu ahz u kabz ve düyûnunu edâya vasiyy-i muhtârı olan Mehmed Efendi b. Ali nâm kimesne meclis-i şer‘-i şerîfde hâfız-ı hâze’l-kitâb es-Seyyid Mehmed Çelebi b. es-Seyyid Bilâl nâm kimesne mahzarında ikrâr ve takrîr-i kelâm edip vasiyy-i muhtârı olduğum müteveffâ-yı mezbûrun zimem-i nâsda olan hukūkunu taleb ve da‘vâ ve ahz u kabza ve bana îsâle ve kabz ve îsâl mütevakkıf olduğu umûrun küllîsine tarafımdan mezbûr es-Seyyid Mehmed Çelebi’yi vekîl ve nâib-i menâb nasb ve ta‘yîn edip ol dahi vekâlet-i mezbûre[yi] kabûl ve merâsimini edâya ta‘ahhüd eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Ali, Mehmed Çelebi b. Ali, Halil Çelebi b. Receb, Mustafa b. Mehmed, Ahmed Efendi b. Mehmed, Hasan Efendi el-Müezzin, İbrahim Çelebi b. ( ) ve gayruhüm.