İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 125 Hüküm no: 72 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. İbrahim’in mirasını elinde bulunduran Bayram Efendi b. Receb’in parayı vârislere verdiği Mahmiye-i İstanbul’da Keçeci Pîrî mahallesinde sâkine iken bundan akdem vefât eden Ayşe bt. İbrahim nâm sagīrenin mîrâsını vâlidesi Belkıs bt. Abdullah nâm hâtun ile li üm karındaşı diğer Ayşe ve li ebeveyn ammi oğulları Mehmed ve Osman ve diğer Mehmed ve Ahmed ebnâ-i Mustafa nâm kimesnelere münhasıra olup ba‘dehu mezbûre diğer Ayşe dahi vefât edip verâseti? vâlidesi mezbûre Belkıs’a münhasıra olduğu şer‘an zâhir ve müte‘ayyin oldukdan sonra mezbûr Mehmed kendi tarafından asâleten ve karındaşları mezbûrûn Osman ve diğer Mehmed ve Ahmed tarafından husûs-ı âti’l-beyâna vech-i âtî vekâlet iddi‘â etmekle vekâleten meclis-i şer‘-i şerîfde sagīre-i mezbûrînler hâl-i hayâtında tesviye-i emrine kıbel-i? şer‘îden mansûb vasîsi olmağla terekesine hâlâ vâzı‘ü’l-yed olan fahrü’l-kuzât bâ‘is-i hâze’l-kitâb Bayram Efendi b. Receb nâm kimesne mahzarında üzerine da‘vâ ve takrîr-i kelâm edip müteveffâ[t-ı] mezbûr[e] Ayşe’nin terekesinden ber mûceb-i defter-i kassâm vasiyy-i merkūm Bayram Efendi makbûzu olan doksan bin yüz seksen akçeden merkūm Bayram Efendi sagīr-i mezbûrenin hayâtında nafakasına ve fevt oldukda techîz ve tekfînine masrûf olan iki bin yüz elliden bâkī yedinde olan yedi bin otuz akçeden karındaşları mezbûrûn Osman ve diğer Mehmed ve Ahmed hisse-i âidleri taleb ve da‘vâ ve ahz u kabz ve kendilere îsâle ve ahz u kabz ve îsâl mütevakkıf olduğu umûrun küllîsine tarafından beni vekîl edip ben dahi vekâlet-i mezbûreyi kabûl etmekle hâlâ mezbûr Bayram Efendi’ye suâl olunup meblağ-ı bâkī-i mezbûrdan benim hissem karındaşlarım mezbûrûn Osman ve diğer Mehmed ve Ahmed hisseleri olan cem‘an üç bin beş yüz on beş akçeyi bana teslîme tenbîh olunmak matlûbumdur dedikde gıbbe’s-suâl mezbûr Bayram Efendi cevâbında müteveffât-ı mezbûrenin terekesinde ber mûceb-i defter-i kassâm meblağ-ı bâkī-i mezbûr makbûzu olduğunu ikrâr, lâkin müdde‘î-i mezbûr Mehmed’in karındaşları mezbûrân Osman ve diğer Mehmed ve Ahmed tarafından ber vech-i tahrîr vekîl olduğunu inkâr etmeğin müdde‘î-i mezbûr Mehmed’den vech-i muharrer vekâletine beyyine taleb olundukda udûl-i ahrâr-i ricâl-i müslimînden olup mahmiye-i mezbûrdan Hoca Pîrî mahallesinde Receb b. Mehmed ve Şeyh Ebülvefâ mahallesinden Ömer b. Osman nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûrûn Osman ve diğer Mehmed ve Ahmed tereke-i müteveffâ-yı mezbûrdan mezkûra bi haseb-i irs intikāl eden hisse-i şer‘iyyelerini tereke-i müteveffât-ı mezbûreye vâzı‘ü’l-yed olan vasiyy-i mezbûr Bayram Efendi’den taleb ve da‘vâ ve ahz u kabz ve kendilere îsâle ve ahz u kabz ve îsâl mütevakkıf olduğu emrin cümlesine taraflarından müdde‘î-i mezbûr Mehmed’i bizim huzûrumuzda vekîl ve nâib-i menâb nasb? ve ta‘yîn edip ol dahi vekâlet-i mezbûreyi kabûl etmiş idi biz bu husûsa bu vech üzre şâhidleriz, şehâdet dahi ederiz deyû her biriedâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûrun ber vech-i muharrer vekâletine ba‘de’l-hükm-i şer‘î müdde‘î-i mezbûre ile müvekkil-i merkūmenin hisseleri olan meblağ-ı mezbûr [18b] üç bin beş yüz on beş akçeyi müdde‘î-i mezbûra teslîme mezbûr Bayram Efendi’ye tenbîh olundukdan sonra müdde‘î-i mezbûra meclis-i şer‘de merkūm Bayram Efendi huzûrunda ikrâr ve takrîr-i kelâm edip ânifen teslîmine tenbîh olunan meblağ-ı mezbûr üç bin beş yüz on beş akçeyi merkūm Bayram Efendi bana def‘ ve teslîm ben dahi bi’t-tamâm îsâl ve vekâleten ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ihdâ ve ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Ahmed Çelebi b. el-Hâc Murad, Ahmed Efendi el-İmâm-ı mahalle-i Şeyhülvefâ, Ahmed Efendi b. Mehmed el-Müezzin, İbrahim Çelebi b. Ahmed, Musa Efendi b. ( ), Veli Bey b. ( ), Mehmed Çelebi b. ( ) ve gayruhüm mine’l-hâzırîn.