İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 126 Hüküm no: 73 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mustafa’nın eşi Yusuf b. Abdullah’tan muhâla‘a yoluyla boşandığı Mahmiye-i İstanbul’da Hoca Üveys mahallesi sâkinelerinden Emine bt. Mustafa nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Yusuf b. Abdullah nâm kimesne mahzarında ikrâr ve takrîr-i kelâm edip zevcim mezbûr Yusuf zimmetinde mütekarrir ma‘kūdun-aleyh olan bin sekiz yüz akçe mehr-i müeccelimin sekiz yüz akçesini bana edâ ve teslîm. ben dahi yedinden ahz u kabz edip bâkī bin akçe mehr-i müeccelim ve nafaka-i iddet-i mu‘ayyene-i ma‘lûmemden üzerlerine ve me’ûnet-i süknâm dahi kendi üzerime olmak üzre zevcim mezbûr Yusuf ile muhâla‘a-i şer‘iyye ile muhâla‘a edip ol dahi muhâla‘a-i mezbûreyi kabûl ettikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, İbrahim Çelebi b. Himmet, Derviş Çelebi b. Hüseyin, el-Hâc Bilâl b. Abdullah, Veli Bey b. Mahmud, Ebûbekir b. Hüseyin ve gayruhüm.