İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 134 Hüküm no: 83 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram b. Abdullah’ın Mustafa Bey b. Nasûh tarafından dövüldüğü ve yaralandığı Mahmiye-i İstanbul’da Mimar Acem mahallesi sâkinlerinden râfi‘-i hâze’l-kitâb Bayram b. Abdullah nâm kimesne, dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde Mustafa Bey b. Nasûh nâm kimesne mahzarında üzerine da‘vâ ve takrîr-i kelâm edip mezbûr Mustafa Bey târih-i kitâbdan bir gün mukaddem ba‘de’l-asr mahalle-i mezbûrede vâki‘ menzilimin kapısı önüne sarhoş gelip sakalım yolup ve hançer ile sol küreğim üzerine ve sağ elimin sebbâbe parmağına işbu darb ve cerh etmekle hâlâ mezbûr Mustafa Bey’e suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine [21a] beyyine taleb olundukda mahalle-i mezbûre ahâlîsinden Mehmed Efendi b. Mustafa ve Süleyman b. Abdi ve Musa b. Muharrem nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka târih-i kitâbdan bir gün mukaddem ba‘de’l-asr mezbûr Bayram’ın mahalle-i mezbûrede vâki‘ menzilinin kapısı önüne mezbûr Mustafa Bey sarhoş gelip bizim huzûrumuzda mezbûr Bayram’ın sakalını yolup ve hançer ile sol küreği üzerine ve sağ elinin sebbâbe parmağına işbu darb ve cerh etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûceb-i şer‘îsi ba‘de’l-ber’ icrâ olunmak üzre mâ vaka‘a bi’t-taleb ketb olundu. Fi’l-yevmi’s-sânî ve ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Ali Efendi b. Süleyman, İsmail Efendi b. Süleyman, Halil b. İbrahim, Yusuf b. Abdullah, Receb b. Mehmed ve gayruhüm mine’l-hâzırîn.