İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 135 Hüküm no: 85 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Kaptan b. Sarı Kethüdâ’nın Mustafa Beşe b. Süleyman ile el-Hâc Mustafa b. Mehmed’e borçlu olduğu Mahmiye-i İstanbul’da Mahmud Paşa kurbunda sâkin olup şerîkler olan bâ‘isey hâze’l-kitâb Mustafa Beşe b. Süleyman ve el-Hâc Mustafa b. Mehmed nâm kimesneler dîvân-ı kāimmakām-ı hazret-i sadr-ı a‘zamîde akd olan meclis-i şer‘-i şerîfde kasaba-i Beşiktaş sâkinlerinden Halil Kapudan b. Sarı Kethüdâ nâm kimesne mahzarında üzerine da‘vâ ve takrîr-i kelâm edip mezbûr Halil Kapudan zimmetinde târih-i kitâbdan iki sene mukaddem yedimizden iştirâ ve kabz eylediği otuz yedi re’s esb semenlerinden dört bin üç yüz otuz esedî guruş hakkımız olmağla hâlâ mezbûr Halil Kapudan’a suâl olunup meblağ-ı mezbûrun alıverilmesi matlûbumuzdur dediklerinde gıbbe’s-suâl mezbûr Halil Kapudan cevâbında kaziyye minvâl-i muharrer üzre olup iştirâ ve kabz ettiği mârrü’z-zikr otuz yedi re’s esb semenlerinden zimmetinde müdde‘iyân-ı mezbûrân Mustafa Beşe ve el-Hâc Mustafa’ya meblağ-ı mezbûr dört bin üç yüz otuz esedî guruş vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı mezbûr dört bin üç yüz otuz guruşu müdde‘iyân-ı mezbûrân Mustafa Beşe ve el-Hâc Mustafa’ya edâ ve teslîme mezbûr Halil Kapudan’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Umdetü erbâbü’t-tahrîr ve’l-kalem Hasan Efendi tezkire-i ûlâ, kıdvetü ashâbi’s-satır ve’r-rakam Yusuf Efendi tezkire-i sâniye, Muhzır Kasım Ağa, çavuşbaşı Murad Ağa.