İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 136 Hüküm no: 86 Orijinal metin no: [21a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Odabaşı b. Hüseyin’in Şaban Beşe b. Receb’e verdiği paranın ve diğer eşyanın Şaban Beşe tarafından Bağdad Ağası Ahmed Ağa’ya teslim edildiği Mahmiye-i İstanbul’da Emin Bey mahallesi sükkânından Mehmed Odabaşı b. Hüseyin nâm kimesne meclis-i şer‘-i şerîf-i lâzımü’t-teşrîfde, Şaban Beşe b. Receb nâm kimesne mahzarında üzerine da‘vâ ve takrîr-i kelâm edip bundan akdem mezbûr Şaban Beşe’ye beynimizde ma‘lûm bir husûs için bi tarîki’r-rüşvet yüz esedî guruş ile üçer guruş kıymetli dört zirâ‘ neftî çukamı def‘ ve teslîm ol dahi yedimden ahz u kabz etmeğin hâlâ suâl olunup meblağ-ı mezbûr yüz esedî guruş ile mârrü’z-zikr çukanın aynı mevcûd ise aynını ve istihlâk ise kıymet-i şer‘iyyelerinin alıverilmesi matlûbumdur dedikde gıbbe’s-suâl mezbûr Şaban Beşe cevâbında mârrü’z-zikr çukamı ve meblağ-ı mezbûr yüz esedî guruşu müdde‘î-i mezbûr Mehmed Odabaşı sâbıkan Bağdad Ağası olan Ahmed Ağa nâm kimesneye teslîm eyle deyû bundan akdem bi tarîki’l-emâne bana def‘ ve teslîm ben dahi yedinden ahz u kabz eylediğimden sonra ber vech-i muharrer makbûzum olan mârrü’z-zikr çuka ile [22b] meblağ-ı mezbûru merkūm Ahmed Ağa’ya def‘ ve teslîm ol dahi yedimden tamâmen ahz u kabz etmiş idi deyû def‘ ile mukābele edicek isre’l-istintâk ve akībe’l-inkâr mezbûr Şaban Beşe’den def‘-i mezbûrunu mübeyyine beyyine taleb olundukda udûl-i müslimînden olup mahmiye-i mezbûre mahallâtından Sufiler mahallesi sükkânından Ali Odabaşı b. Mustafa ve diğer Mehmed Odabaşı b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Mehmed Odabaşı meblağ-ı mezbûr yüz esedî guruş ile mârrü’z-zikr dört zirâ‘ çukasını hâlâ Bağdad Ağası olan mezbûr Ahmed Ağa’ya teslîm eyle deyû bundan akdem bizim huzûrumuzda merkūm Şaban Beşe’ye def‘ ve teslîm ol dahi ber vech-i muharrer yedinden ahz u kabz etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olduğundan sonra mezbûr Şaban Beşe husûs-ı mezbûra emîn olup yemîn ile müsaddak olmağla ber vech-i muharrer makbûz olan meblağ-ı mezbûr yüz esedî guruş ile sâlifü’z-zikr dört zirâ‘ çukası merkūm Ahmed Ağa’ya tamâmen def‘ ve teslîm edip yedinde bâkī kalmadığına yemîn teklîf olundukda ol dahi alâ vefki’l-mes’ûl yemîn billâhi te‘alâ etmeğin mûcebiyle müdde‘î-i mezbûr ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Beşe b. Mustafa, İbrahim Çelebi b. Ahmed, Eyyûb b. Ali, Mustafa b. Ramazan, Veli Beşe b. Mahmud, Osman Beşe b. Ömer, Ebûbekir b. Hüseyin, Mustafa Çelebi b. el-Hâc Ahmed ve gayruhüm.