İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 159 Hüküm no: 113 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Mahmud’un Ahmed Efendi b. İlyas’tan muhâla‘a yoluyla boşandığı Mahmiye-i İstanbul’da Tercüman Yunus mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sâkinlerinden Müezzin Mehmed Çelebi b. Murad nâm kimesneler ta‘rîfleri ile mu‘arrefe olan Emetullah bt. Mahmud nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Ahmed Efendi b. İlyas mahzarında ikrâr ve takrîr-i kelâm edip zevcim mezbûr Ahmed Efendi zimmetinde mütekarrir ve ma‘kūdun-aleyh mehr-i müeccelim olan yüz esedî guruş ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre ve mezbûr Ahmed Efendi’nin firâşından hâsıl sadrî oğlum Mustafa nâm sagīri yedi yaşına değin kendi malımdan infâk ve iksâ etmek üzre zevcim mezbûr Ahmed Efendi ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra zevciyyette kāime iken mezbûr Ahmed Efendi’ye hibe ve teslîm eylediğim bir sîm gaddâreye ve hukūk-ı zevciyyete müte‘allika âmme-i da‘vâdan mezbûr Ahmed Efendi’nin zimmetini [27b] ibrâ ve iskāt edip ol dahi benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Çelebi b. Hasan, Hüseyin Çelebi b. Mustafa, Mahmud Çelebi b. İsmail, Mehmed Efendi b. Ali Efendi, İbrahim Çelebi b. Ahmed, Ebûbekir b. Hüseyin ve gayruhüm.