İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 160 Hüküm no: 115 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacca giden Müstedâm Çavuş camii imamı Mehmed’in yerine Ali’nin vekil tayin edildiği [Derkenâr:] Kâbe-i mükerreme’ye izin emridir, ma‘lûm ola. Akzâ kuzâti’l-müslimîn evlâ vülâti’l-muvahhidîn ma‘denü’l-fezâ’il ve’l-yakīn hüccetü’l-hak ale’l-halki ecmâ‘în vâris-i ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîdet fezâ’iluhû-tevkī‘-i refî‘-i hümâyûn vâsıl olıcak ma‘lûm ola ki dârende-i fermân-ı hümâyûn Mehmed dergâh-ı mu‘allâma gelip mahmiye-i İstanbul’da Sancakdâr Hayreddin mahallesinde vâki‘ müteveffâ Müstedâm Çavuş câmi‘i’nin berât-ı şerîfi [ile] imâm ve hatîb olup inâyet-i Rabbânî karîn-i hısâl ve hidâyet-i Samedânî rehin-i âmâli olup işbu sene-i mübârekede tavâf-ı Beytullâhi’l-harâm ve ziyâret-i Ravza-i mutahhara-i Hazret-i Resûl-i seyyidü’l-enâm -ve aleyhi efdalü’s-salât ve’s-selâm-niyyet ve azîmet etmekle izn-i şerîfim verilmek bâbında inâyet recâ etmeğin bi’l-fi‘l şeyhü’l-İslâm olan a‘lemü’l-ulemâ’i’l-mütebahhirîn Mevlânâ Ali -edâmallâhu te‘âlâ fezâ’iluhû-nun işâretiyle yerine nasb eylediği vekîli edâ-i hizmet etmek üzre izn-i hümâyûn erzânî kılınmışdır. Buyurdum ki mezbûr işbu sene-i mübârekede hacc-ı mebrûru edâ edip gelince yerine nasb eylediği vekîli edâ-i hizmet eylediğinden sonra min ba‘d imâmet ve hitâbetine âharı dahl ve ta‘arruz ettirmeyesiz, şöyle bilesiz alâmet-i şerîfe i‘timâ[d] kılasız. Tahrîren fî evâhiri şehri Muharremi’l-harâm sene seb‘a ve semânîn ve elf. Mahrûse-i [Kostantıniyye].