İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 161 Hüküm no: 116 Orijinal metin no: [27b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Habeş asıllı Reyhan b. Abdullah’ın Ali Bey b. Ahmed’in kölesi olduğunun tesbiti Vilâyet-i Rumeli’nde Pra[va]di kasabasında hallâc İbrahim mahallesi ahâlîsinden olup mahmiye-i İstanbul’da Debbâğ Yunus mahallesinde bi tarîki’l-müsâfir sâkin bâ‘is-i hâze’l-kitâb Ali Bey b. Ahmed nâm kimesne meclis-i şer‘-i şerîfde işbu orta boylu, açık kaşlı, Habeşiyyü’l-asl Reyhan b. Abdullah nâm şâbb-ı emred mahzarında üzerine da‘vâ ve takrîr-i kelâm edip mezbûr Reyhan abd-i memlûküm olup târih-i kitâbdan üç buçuk sene mukaddem yedimden ibâk edip hâlâ bana rıkka inkıyâddan imtinâ‘ eder mezbûr Reyhan’a suâl olunup bana rıkka inkıyâd etmek üzre tenbîh olunmak matlûbumdur dedikde gıbbe’s-suâl mezbûr Reyhan cevâbında târih-i kitâbdan üç buçuk sene mukaddem mâlikim âhar kimesne idi deyip müdde‘î-i mezbûrun abd-i memlûk olduğunu [28a] inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup kasaba-i mezbûrede mahalle-i mezbûre sâkinlerinden Abdülbâkī Çelebi b. Ahmed ve Ebûbekir b. Musa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mevsûf-ı mezbûr Reyhan müdde‘î-i mezbûr Ali Bey’in yedinde mülkü olup târih-i kitâbdan üç buçuk sene mukaddem yedinden ibâk etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûr Ali Bey’e mevsûf-ı mezbûr Reyhan âhara bey‘ ve hibe ve bâ taraf-ı şer‘iyyeden bir tarîk ile mülkünden ihrâc etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mevsûf-ı mezbûr Reyhan müdde‘î-i mezbûra rakīk olup inkıyâd etmek üzre teslîm olunmağın mâ vaka‘a bi’t-taleb ketb olundu. Min Saferi’l-hayr li sene seb‘a ve semânîn ve elf Şuhûdü’l-hâl: Ebûbekir b. Hüseyin, Ömer Çelebi b. ( ) berber, Şaban Çelebi b. el-Hâc Mustafa.