İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 239 Hüküm no: 204 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Abdullah’ın barutçuluk işinde ortaklarıyla alacak vereceği kalmadığı Mahmiye-i İstanbul’da Ebâ Eyyûb-i Ensârî kapısı dâhilinde Koca Mustafa Paşa mahallesi ahâlîsinden olup barutçu tâ’ifesinden iken şeref-i İslâm ile müşerref olan Ahmed Beşe b. Abdullah nâm kimesne meclis-i şer‘-i şerîfde tâ’ife-i mezbûreden olup kendi tarafından asîl ve Mıgırdiç nâm zimmî tarafından husûs-ı âti’l-beyâna vekîl olduğu Kayzar v. Serkis ve Kirador v. Krikor nâm zimmîler şehâdetleri ile şer‘an sâbit olan Bogos v. Krikor nâm zimmî ile tâ’ife-i mezbûreden Avanos v. Timur ve Artin v. Avanos ve Haçador v. Toros nâm zimmîler ile mezbûrân Kazar ve Kirador mahzarlarında ikrâr ve takrîr-i kelâm edip ben ve mezbûrûn Mıgırdiç ve Bogos ve Kazar ve Kirador ve Avanos ve Artin ve Haçador barutçuluk san‘atında şerîkler olup bin yetmiş dokuz senesinden beri mâl-ı şirket-i mezbûrdan taraf-ı mîrîye işlediğimiz barut akçesinden nîm hisseye isâbet eden üç bin guruşu mezbûrdan ahz u kabz ettiklerinden sonra bundan akdem meblağ-ı mezbûrun üç yüz guruşunu mezbûrûn yedlerinden taleb ve da‘vâ eylediğimde anlar dahi cevâblarında, sen şeref-i İslâm ile müşerref olmazdan mukaddem husûs-ı mezbûra müte‘allika âmme-i da‘vâdan bizim zimmetimizi ibrâ-i âm ile ibrâ ve iskāt etmiş idin deyû def‘ ile mukābele ve def‘-i mezbûrunu dahi isbât edemediklerinden mâ‘adâ cihet-i mezbûreden bâkī sana ancak beş yüz on guruş deynimiz var idi deyû ikrâr ve i‘tirâf etmeleri ile, ben dahi ikrârları mertebesi olan meblağ-ı mezbûr beş yüz on guruşu mezbûrûn Mıgırdiç ve Bogos ve Kazar ve Kirador ve Avanos ve Artin ve Haçador yedlerinden ahz u kabz edip husûs-ı mezbûra müte‘allika âmme-i da‘vâdan mezbûrûnun zimmetlerini ibrâ-i âmm-ı kātı‘ü’l-hısâm ile ibrâ ve iskāt ettiğimden sonra zikr olunan barutçuluk san‘atında mezbûrûn ile ke’l-evvel şerîkler olup beynimizde hâsıla olan fâ’ide yedi sehim kılındıkdan sonra bir sehim karındaşım olan mezbûr Haçador ile benim olup ve altı sehimden bireri mezbûrûn Mıgırdiç ve Bogos ve Kazar ve Kirador ve Avanos ve Artin’den her birinin olmak üzre mezbûrûn ile kavl ü ittifâk ve ahd ü mîsâk eyledik dedikde mezbûr Bogos kendi tarafından asâleten ve mezbûr Mıgırdiç tarafından vekâleten ve mezbûrûn Kazar ve Kirador ve Avanos ve Artin ve Haçador’dan her biri dahi asâleten merkūm Ahmed Beşe’yi cemî‘ kelimâtında tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mustafa Beşe b. Mehmed, Yusuf Ağa b. Abdullah sâkin-i Galata, el-Hâc Hüseyin b. Mehmed sâkin-i mahalle-i Oruc? Bey, Mustafa Çelebi b. Mehmed sâkin-i (...), Mahmud Bey b. Mustafa sâkin-i mahalle-i (...) ve gayruhüm mine’l-hâzırîn.