İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 240 Hüküm no: 205 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Danyal v. Kostantin’in, Bereket adlı zimmîden almış olduğu borcunu ödemesi gerektiği Mahmiye-i İstanbul’da Mirahor mahallesinde sâkin Dimitraşko v. Kurd nâm zimmînin li ebeveyn karındaşı ve tarafından husûs-ı âti’l-beyâna vekîl olduğu mahalle-i mezbûre sükkânından Peykel? v. Murat ve Todori v. Kosta nâm zimmîler şehâdetleri ile şer‘an sâbit olan bâ‘is-i hâze’s-sifr Bereket nâm zimmî meclis-i şer‘-i şerîfde vilâyet-i Rumeli’nde Vidin kasabası ahâlîsinden Danyal v. Kostantin nâm râhib mahzarında bi’l-vekâle üzerine da‘vâ ve takrîr-i kelâm edip müvekkilim mezbûr Dimitraşko’nun mezbûr Danyal zimmetinde cihet-i karz-ı şer‘îden iki bin beş yüz otuz beş esedî guruş hakkı olup mezbûr Danyal meblağ-ı mezbûrun altı yüz esedî guruşunu müvekkil-i mezbûrun sâbıkan vekîli olan gāib ani’l-meclis Yani nâm zimmîye edâ ve teslîm ol dahi bi’l-vekâle ahz u kabz edip bin dokuz yüz otuz beş esedî guruşu zimmetinde bâkī kalmağla hâlâ suâl olunup meblağ-ı bâkī-i mezbûr bin dokuz yüz otuz beş esedî guruşun mezbûr Danyal’dan alıverilmesi bi’l-vekâle matlûbumdur dedikde gıbbe’s-suâl mezbûr Danyal cevâbında müvekkil-i mezbûrdan ancak bin beş yüz elli esedî guruş iktirâz ve tesellüm edip meblağ-ı mezbûrun beş yüz esedî guruşunu târih-i kitâbdan bir sene mukaddem ve beş yüz esedî guruşunu dahi târih-i mezbûrdan dört ay mukaddem vekîl-i mezbûr Yani’ye edâ ve teslîm ol dahi bi’l-vekâle ahz u kabz etmekle müvekkil-i mezbûre zimmetimde ancak beş yüz elli esedî guruş deynim bâkī kalmışdır deyû ziyâdeyi inkâr ve vekîl-i mezbûra ber vech-i muharrer bin esedî guruş edâ ve teslîm etmiş idim deyû def‘le mukābele edicek isre’l-istintâk ve’l-inkâr müdde‘î-i mezbûrdan ziyâde da‘vâsiyçün mezbûr Danyal’dan def‘-i mezbûrunu mübeyyine beyyine taleb olundukda ityâniyçün her biri istimhâl etmeğin mehl-i şer‘î ile imhâl olunduklarından sonra ikrârı mertebesi olan meblağ-ı bâkī-i mezbûr beş yüz elli esedî guruşu müdde‘î-i mezbûr Bereket’e def‘ ve teslîme mezbûr Danyal’a tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Veli Beşe b. Mahmud, Osman b. Ömer, Durmuş b. Veli.