İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 242 Hüküm no: 207 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Asvador v. Sakar’ın, Papa Avanos v. Yani’den satın aldığı bağı almaktan vazgeçip geri verdiği Mahmiye-i İstanbul hısnı ebvâbından Kumkapısı dâhilinde ( ) sâkin Papa Asvadur v. Sakar nâm Nasrânî meclis-i şer‘-i şerîfde Papa Avanos v. Yani nâm Nasrânî muvâcehesinde ikrâr-ı tâm ve takrîr-i kelâm edip bin seksen altı Rebî‘ilevveli’nin yedinci günü mezbûr Avanos medîne-i Üsküdar hâricinde vâki‘ bir tarafdan Zakar ve iki tarafdan İvaz nâm Ermenilerin bağları ve bir tarafdan tarîk-i âm ile mahdûd bağı, tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki yüz kıt‘a esedî guruşa bana bey‘ ve temlîk ve teslîm ben dahi ber vech-i iştirâ ve tesellüm ve temellük ettiğimden sonra semeni olan meblağ-ı mezbûru yedimden tamâmen ahz u kabzetmiş idi hâlâ bey‘-i mezbûru rızâm ile ibtâl etmekle zikr olunan bağı geri mezbûr Papa Avanos’a def‘ ve teslîm ol dahi ahz u kabz edip semen-i mezkûr iki yüz kıt‘a esedî guruşu geri mezbûr Papa Avanos yedinden tamâmen ahz u kabz eyledim ba‘de’l-yevm bağ-ı mezbûr merkūm Papa Avanos’un ke’l-evvel mülkü olmuşdur, benim alâkam ve medhalim yoktur, keyfe mâ yeşâ’ ve hasbe mâ yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn li sene seb‘a ve semânîn ve elf. Şuhûd[ü’l-hâl]: Mustafa Çelebi b. Hasan, Hasan Beşe b. Abdullah, Receb b. Mehmed, İbrahim b. Mehmed, el-Hâc Ahmed b. Abdurrahman, Papa Asvadur v. Yakob, Papa Haçador v. Sarga, Papa Kasbar, Papa Sahak, Hacı Sahak, Marit? v. Arakil, Mergo? v. Davor, Manos Keresteci, Makrascı Serabyo, Makrascı Mardiros ve gayruhüm.