İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 241 Hüküm no: 206 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beykoz ahalisinden Melkon’u öldüren Mehmed b. Abdullah’ın, Melkon’un vârislerine diyet ödemesi gerektiği Vilâyet-i Anadolu’da Yoros kazâsına tâbi‘ Beykoz nâm kasaba ahâlîsinden olup bundan akdem hâlik olan Melkon nâm zimmînin verâseti zevcesi Harsima nâm Nasrâniyye ile sulbiye kızları Gülsün ve Gevher’e ve sulbî kebîr oğlu Kasbar ve âhar sulbî oğlu olup cünûn-ı mutbık ile mecnûn olan Bağdasar nâm Nasrânîlere münhasıra olduğu şer‘an sâbit oldukdan sonra mezbûre Gülsün kendi tarafından asâleten ve mecnûn-ı mezbûrun tesviye-i umûruna kıbel-i şer‘den vasî nasb olunmağla vesâyeten vâlidesi mezbûre Harsima tarafından husûs-ı âti’l-beyâna vekîl olduğu ber nehc-i şer‘î üzre vekîl olduğu sâbit olmağla vekâleten mezbûrân Gevher ve Kasbar dahi asâleten dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde Mehmed b. Abdullah nâm kimesne mahzarında üzerine da‘vâ ve takrîr-i kelâm edip mezbûr Mehmed târih-i kitâb şehrinin on beşinci gecesi ba‘de’l-işâ menzilimize girip, babamız Melkon’un sağ kulağı üzerine odun ile darb edip ol darbdan babamız Melkon hâlik olup hattâ mezbûr Mehmed menzilimizde babamız mezbûr Melkon’un sağ kulağı üzerine odun ile darb edip ol darbdan mezbûr Melkon hâlik olduğunu kasaba-i mezbûrede nâibü’ş-şer‘ olan Ali Efendi huzûrunda katl bi’l-müsakkali ikrâr dahi etmekle merkūm Ali Efendi yedimize hüccet-i şer‘iyye dahi vermişdi hâlâ mezbûr Mehmed’e suâl olunup babamız mezbûr Melkon’un tamâm diyeti olup ihtiyâr eylediğimiz her anı yedi miskāl gelir on bin dirhem-i şer‘î fıddîyi bize edâ ve teslîm etmek üzre mezbûr Mehmed üzerine hükm ve kazâ olunmak matlûbumuzdur deyû mazmûnu min külli’l-vücûh takrîr-i meşrûhlarını nâtık târih-i mezbûr ile müverrah ve merkūm Ali Efendi’nin imzâsıyla mümzât ve [hatmi] ile mahtûme hüccet-i şer‘iyye ibrâz edip mezbûr Mehmed’e suâl olundukda ol dahi cevâbında [52a] kaziyye minvâl-i muharrer üzre olup târih-i kitâb şehrinin on beşinci gecesi mezbûr Melkon kasaba-i mezbûrda vâki‘ menziline ba‘de’l-işâ girip sağ kulağının üzerine odun ile darb ettiğimde mezbûr Melkon ol darbede hâlik olmuş idi deyû bi tav‘ihî ikrâr ve i‘tirâf etmeğin alâ mûceb-i i‘tirâf hâlik-i mezbûr Melkon’un tamâm diyeti olup müdde‘ûn-ı mezbûrûnun muhtârları olan anı yedi miskāl gelir on bin dirhem-i şer‘î fıddîyi mezbûr Mehmed müdde‘ûn-ı mezbûrûna edâ ve teslîm etmek üzre mezbûr Mehmed muvâcehesinde hükm ve kazâ olunmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Hasan Efendi tezkire-i ûlâ, Yusuf Efendi tezkire-i sâniye, Murad Ağa Çavuşbaşı, Kasım Ağa, Veli Ağa, Mustafa Ağa.