İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 243 Hüküm no: 209 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Reis’in Rumeli iskelelerinden gemiyle İstanbul’a buğday getirmesine mani olunmaması Sefîne reislerinden bâ‘is-i hâze’l-kitâb İbrahim Reis nâm kimesne meclis-i şer‘-i şerîfde takrîr-i kelâm ve ta‘bîr-i ani’l-merâm edip hâlâ vilâyet-i Rumeli’nde Kavala ve Selânik ve Kotur ve Kesendire ve Siroz ve Çayağzı iskelelerine ve sâir iskelelere varıp buğday iştirâ edip şayka ta‘bîr olunur sefîneme tahmîl eylediğimden sonra harbî kefereye bey‘ etmeyip doğru getirip, mahmiye-i İstanbul’da bey‘ etmek üzre azîmetim olmağla zikr olunan iskelelerde ber vech-i muharrer mahmiye-i mezbûreye getirmek için buğday iştirâ ettiğime kimesne mâni‘ olmamak için li ecli’l-istîsâk taraf-ı şer‘den kefîlim alınıp vesîka tahrîr olunmak matlûbumdur dedikde mahmiye-i mezbûrda Manisalı Çelebi mahallesi sâkinlerinden Mustafa Çelebi b. Bayram ve Hasan Çelebi b. Mehmed nâm kimesnelerden her biri mezbûr İbrahim Reis zikr olunan iskelelerde iştirâ ettiği buğdayı âhar diyâra götürmeyip ve harbî kefereye bey‘ etmeyip doğru mahmiye-i mezbûreye getirip bey‘ etmesine kefîl olmağın taraf-ı şer‘den işbu vesîka ketb ve terkīm olundu. Fi’l-yevmi’s-sâbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Çelebi b. Hasan, İbrahim Çelebi b. Mehmed, el-Hâc Mustafa b. Tevekkül, Osman b. Ömer, Ebûbekir b. Hasan ve gayruhüm.