İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 244 Hüküm no: 210 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İstamo ile bakkal Yani v. Rizo arasındaki borç meselesinde Yorgi’nin borçlu olduğunun tesbiti Mahmiye-i İstanbul’da Küçük Ayasofya câmi‘-i şerîfi kurbunda Hüseyin Ağa mahallesinde bakkal olan râfi‘-i hâze’l-kitâb Yani v. Rizo nâm zimmî meclis-i şer‘-i şerîfde bâzirgân tâ’ifesinden Yorgi v. İstamo nâm zimmî muvâcehesinde üzerine da‘vâ ve takrîr-i kelâm edip bin yetmiş beş senesinde mahalle-i mezbûrede vâki‘ bakkal dükkânım önünde on bin sekiz yüz akçemi mezbûr Yorgi’ye bi tarîki’l-karz def‘ ve teslîm ol dahi ahz u kabz edip hattâ şuhûd mahzarında ikrâr dahi edip yedime hat ve hatmi hâvî işbu temessükü dahi vermiş idi hâlâ mezbûr Yorgi’ye suâl olunup meblağ-ı mezbûrun bana edâ ve teslîme tenbîh olunmak matlûbumdur dedikde gıbbe’s-suâl akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sâkinlerinden olup zikr olunan câmi‘-i şerîfde devirhân olan Ahmed Efendi b. Ömer ve kayyım olan Mustafa Halîfe b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Yorgi bin yetmiş beş senesinde müdde‘î-i mezbûr Yani yedinden bi tarîki’l-karz on bin sekiz yüz akçe ahz u kabz ettiğini bizim huzûrumuzda ikrâr ve bizi istişhâdetmiş idi ve hat ve hatmini hâvî işbu temessükü dahi vermiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ Mustafa Efendi b. Abdülaziz zikr olunan Hüseyin Ağa mahallesine varıp ahâlîsinden İmâm Ahmed Efendi b. İsmail ve Attâr Süleyman Çelebi b. Mustafa ve Süleyman Beşe b. İsmail ve İbrahim b. Şaban ve Hasan b. Hüdâverdi ve İbrahim Çelebi b. Ahmed ve Mustafa Bey b. Mehmed ve İbrahim Beşe b. Ali ve Hasan Çelebi b. Ahmed ve Ali Çelebi b. Ahmed nâm kimesnelerden şâhidân-ı mezbûrân Ahmed Efendi ve Mustafa Halîfe’nin keyfiyyet-i hâllerini suâl eyledikde her biri şâhidân-ı mezbûrân için adl ve makbûlü’ş-şehâdedir velev aleynâ haber verdiklerini Mevlânâ-yı merkūm mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince meblağ-ı mezbûr on bin sekiz yüz akçeyi müdde‘î-i mezbûra edâ ve teslîme mezbûr Yorgi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Mehmed Çelebi b. Abdullah, el-Hâc Mehmed b. Ali, el-Hâc Mehmed b. Receb, Ahmed Ağa b. ( ) ve gayruhüm.