İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 249 Hüküm no: 217 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Ahmed’in para vakfına, eş-Şeyh Mustafa Efendi ile Cafer b. Abdullah’ın nâzır tayin edildiği Mahmiye-i İstanbul’da Hamamcı Muhyiddin mahallesinde vâki‘ merhûm el-Hâc Ahmed nâm sâhibü’l-hayrın vakfı olan bin guruşun nâzırı olmamağla, taraf-ı şer‘den bir nâzır nasb ve ta‘yîn olunmak ehem ve elzem olmağla vakf-ı mezbûrun dersi‘âmı olan eş-Şeyh Mustafa Efendi ile merhûm-ı mezbûrun utekāsından olan Cafer b. Abdullah nâm kimesneler müstakīm ve her vechile nezâret uhdesinden gelmeğe kemâ yenbağī kādir olmağın mezbûrân eş-Şeyh Mustafa Efendi ve Cafer vakf-ı mezkûra hasbî nâzırlar nasb ve ta‘yîn olunduklarında anlar dahi nezâret-i mezbûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’s-sâmin aşer min Saferi’l-hayr li sene seb‘a ve semânîn ve elf. Şuhûdü’l-hâl: Fahrü’l-akrân el-Hâc Kemaleddin Ağa Kethüdâ-yı Hazret-i Efendi, fahrü’l-akrân el-Hâc Hüseyin Ağa b. İdris, el-Hâc Mehmed b. Ali, el-Hâc Mehmed b. el-Hâc Receb.