İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 249 Hüküm no: 216 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Halîfe b. İbrahim’in evini Mustafa Çelebi b. Ömer’e bey‘ bi’l-istiğlâl yoluyla sattığı ve daha sonra kiraladığı Mahmiye-i İstanbul’da Keçeci Pîrî mahallesinde sâkin Hasan Halîfe b. İbrahim nâm kimesne meclis-i şer‘-i şerîf-i enverde bâ‘is-i hâze’l-kitâb Mustafa Çelebi b. Ömer nâm kimesne mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan İbrahim Çelebi mülkü ve bir tarafdan imâma meşrût vakıf menzil ve bir tarafdan Mustafa Çelebi mülkü ve bir tarafdan tarîk-i âm ile mahdûd bir bâb tahtânî oda ve muhavvatayı ve kenîfi müştemil menzilimi, mezbûr Mustafa Çelebi’ye bi tarîki’l-istiğlâl elli esedî guruşa bey‘ ve teslîm ol dahi ber vech-i muharrer tesellüm ettiğinden sonra semeni olan meblağ-ı mezbûr elli kıt‘a esedî guruşu mezbûr Mustafa Çelebi yedinden ba‘de’l-ahz ve’l-kabz menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î mezbûr Mustafa Çelebi, târih-i kitâbdan bir sene tamâmına değin yedi buçuk esedî guruşa bana îcâr ve teslîm ben dahi ber vech-i muharrer istîcâr ve kabûl ve tesellüm eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Veli Beşe b. Mahmud el-Muhzır, Abdurrahman Efendi b. Hüseyin, Mehmed Çelebi b. Mustafa el-Müezzin, suyolcu Mehmed Beşe b. Ahmed, Sarrâc Mahmud b. Muslu, Sarrâc Ali b. Mehmed, el-Hâc Mehmed el-mutâf ve gayruhüm.