İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 250 Hüküm no: 219 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İvaz Odabaşı b. Murad’ın câriyesini azat ettiği Vilâyet-i Rumeli’nde Kırkkilise kasabasında Câmi‘-i Atîk mahallesi sâkinlerinden olup mahmiye-i İstanbul’da Derviş Ali mahallesinde misâfiren sâkin olan İvaz Odabaşı b. Murad nâm kimesne meclis-i şer‘-i şerîf-i enver ve mahfil-i dîn-i münîf-i enverde ikrâr ve takrîr-i kelâm edip bana rıkkıyyetini mu‘terife olan uzun boylu, ala gözlü, kara kaşlı, Rûsiyyetü’l-asl Peymâne bt. Abdullah nâm câriye-i memlûkemi, hasbeten lillâhi te‘âlâ ve hasbeten li rûhi Resûlihî’l-me‘âlî malımdan tahrîr ve i‘tâk ve zümre-i harâir-i asliyyâta idrâc ve ilhâk eyledim ba‘de’l-yevm mevsûfe-i mezbûre sâir harâir-i asliyyât gibi hürre olup üzerinde mevâlî için sâbit olan hakk-ı velâdan gayrı hak ve alâka ve medhalim yoktur dedikde mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: İbrahim Çelebi b. Ahmed, Mehmed b. Mahmud, Terlikî? Mehmed b. ( ), Mustafa Çelebi b. Ahmed el-Müezzin, İsmail Beşe b. Veli, Ramazan Beşe b. Mustafa, Mehmed Beşe b. Receb, Ali b. Receb, Ahmed Beşe b. Abdullah, Osman Çelebi b. Ömer, Mustafa Çelebi b. el-Hâc Ahmed ve gayruhüm.