İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 251 Hüküm no: 220 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Musa’nın eski kocası ile arasındaki alacak davasında sulh oldukları Mahmiye-i İstanbul’da Yazıcı mahallesi sâkinlerinden olup zâtı ma‘rifet-i şer‘iyye ile ârifân Hasan Beşe b. Musa ve Ahmed Beşe b. Mehmed nâm kimesneler ta‘rîfleri ile mu‘arrefe olan Ayşe bt. Musa nâm hâtun meclis-i şer‘-i şerîfde zevc-i sâbıkı Mehmed Efendi b. Veliyyüddin nâm kimesne mahzarında ikrâr ve takrîr-i kelâm edip mezbûr Mehmed Efendi’nin firâşından hâsıla sadriye sagīr kızım merkūme Fâtıma’nın nafaka-i mefrûzasından bin yetmiş dokuz Ramazan-ı şerîfinin ikinci gününden işbu sene tamâmına değin (...) sekiz yüz (...) techîz ve tekfînine mu‘tâd üzre harc ve sarf eylediğim dört yüz akçeyi mezbûr Mehmed Efendi’den da‘vâ ve taleb eylediğimde, ol dahi meblağ-ı mezbûru bana edâdan imtinâ‘ etmekle beynimizde nizâ‘-ı küllî vukū‘undan sonra muslihûn tavassut edip mezbûr Mehmed Efendi ile beynimizde on esedî guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr on esedî guruşu mezbûr Mehmed Efendi yedinden tamâmen ahz u kabz ettiğimden sonra husûs-ı mezbûra müte‘allika âmme-i da‘vâdan mezbûr Mehmed Efendi’nin zimmetini ibrâ-i âmm-ı kātı‘ü’l-hısâm ile ibrâ ve iskāt eyledim ba‘de’l-yevm benden bi’z-zât ya vekîlimden bi’l-vekâle husûs-ı mezbûra müte‘allika da‘vâ dahi sudûr ederse, lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Mustafa b. Tevekkül, Ali Çelebi b. Şaban, İbrahim Çelebi b. Mehmed, Hasan Beşe b. Musa, Hasan Efendi Antakyalı, Molla Mustafa b. Mehmed Beşe, İbrahim Çelebi b. ( ), Ali b. Ayvat ve gayruhüm.