İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 265 Hüküm no: 236 Orijinal metin no: [59a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üftâde bt. Abdullah ile Ahmed Çelebi b. Ali’nin boşandıkları Mahmiye-i İstanbul’da Yeni Câmi‘ kurbunda ( ) mahallesi sâkinelerinden olup zâtı mahalle-i mezbûre sükkânından Cafer b. Abdullah ve İbrahim b. Mustafa nâm kimesneler ta‘rîfleriyle mu‘arrefe olan Üftâde bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i dâhili bâ‘is-i hâze’l-kitâb Ahmed Çelebi b. Ali nâm kimesne mahzarında ikrâr ve takrîr-i kelâm edip zevcim mezbûr Ahmed Çelebi zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzerine zevcim mezbûr Ahmed Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-i mezbûru kabûl eyledikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Mahmud Çelebi b. Süleyman, Osman Çelebi b. el-Hâc Ömer, Mustafa Beşe el-Muhzır ve gayruhüm mine’l-hâzırîn.