İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 265 Hüküm no: 237 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emin İsmail Ağa b. Halil’in Mihaliç’in bazı köylerinden kanunsuz olarak aldığı mehir akçelerini geri ödediği Vilâyet-i Anadolu’da Mihaliç kazâsına tâbi‘ Karacaoba nâm karye ahâlîsinin kethüdâları olan Mustafa b. Abdullah nâm kimesne ile Başköy nâm karye ahâlîsinin kethüdâları olan Murat v. Manol ve Çatalağıl nâm karye ahâlîsinin kethüdâsı Polyoz v. Kiryazi ve İkizce nâm karyenin kethüdâsı Yorgi v. Aci ve Kemrit nâm karye ahâlîsinin kethüdâsı Koçdi v. Yorgila ve Karacaköy nâm karye ahâlîsinin kethüdâsı Yani v. Todori ve Subaşıoğlu karyesi ahâlîsinin kethüdâsı Dimitri v. Todori ve Seryan nâm karye ahâlîsi kethüdâsı olan Karagöz v. Yorgi ve Bermekirli nâm karye ahâlîsinin kethüdâları Kiryazi v. Todori nâm zimmîler meclis-i şer‘-i şerîf-i enverde bi’l-fi‘l kazâ-i mezbûra tâbi‘ İkizceler ağnâmı mukāta‘ası emîni olan bâ‘is-i hâze’l-kitâb İsmail Ağa b. Halil nâm kimesne mahzarında her biri ikrâr ve takrîr-i kelâm edip biz mukāta‘a-i mezkûre re‘âyâsından olmağla kadîmden olageldiği üzre emîn olanlara yedlerinde olan berât ve emr-i şerîf ve defter mûcebince cizye ve hukūk ve rüsûmları edâ edip ziyâde bir nesne vermez iken mezbûr İsmail Ağa kadîmden veregeldiğimiz cizye ve hukūk ve rüsûmdan mâ‘adâ karyelerimiz ahâlîsi için bundan akdem hilâf-ı defter ve emr-i şerîf mehir akçesi nâmıyla bizim yüz altmış esedî guruşumuzu bi gayr-ı vech ahz u kabz etmeğin hâlâ mezbûr İsmail Ağa’dan ber vech-i muharrer makbûzu olan meblağ-ı mezbûr yüz altmış esedî guruşu da‘vâ ve taleb eylediğimizde, ol dahi red ve teslîmden imtinâ‘ etmeğin beynimizde nizâ‘-ı küllî vukū‘undan sonra muslihûn tavassut edip mezbûr İsmail Ağa ile beynimizde altmış esedî guruş üzerine inşâ-i akd-i sulh eylediklerinde biz dahi sulh-i mezbûru kabûl ve bedel-i sulh olan meblağ-ı mezbûr altmış esedî guruşu mezbûr İsmail Ağa yedinden tamâmen ahz u kabz eylediğimizden sonra bâkī yüz esedî guruşdan mezbûr İsmail Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskā eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selh-i Saferi’l-hayr li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Veli Beşe b. Mehmed, Mehmed Ağa kethüdâ-yı muhzırân ve gayruhüm.