İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 267 Hüküm no: 240 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Cafer b. Rasül’ün evini bey‘ bi’l-istiğlâl yoluyla Hayreddin Paşa Vakfı’na satıp daha sonra vakıftan kiraladığı Mahmiye-i İstanbul’da el-Hâc Ferhad mahallesinde sâkin el-Hâc Cafer b. Rasül nâm kimesne, meclis-i şer‘-i enverde mahrûse-i Galata’ya tâbi‘ kasaba-i Beşiktaş’da vâki‘ merhûm Hayreddin Paşa vakfına bi’l-fi‘l mütevellî olan bâ‘is-i hâze’l-vesîka Hasan Efendi b. Mahmud mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Abdurrahman b. Nasûh nâm kimesne mülkü ve bir tarafdan İmâm Mehmed Efendi menzili ve iki tarafdan tarîk-i hâs ile mahdûd bir bâb tahtânî oda ve bir sofa ve müşterek bi’r-i mâ ve bir incir ağacını ve tahta havluyu müştemil menzilimi, mezbûr Hasan Efendi’ye bi tarîki’l-istiğlâl doksan esedî guruşa bey‘ ve teslîm ol dahi mâl-ı vakf-ı mezbûr ile ber vech-i muharrer iştirâ ve tesellüm edip semeni olan meblağ-ı mezbûr doksan esedî guruşu mezbûr Hasan Efendi [60a] yedinden tamâmen ahz u kabz eylediğimden sonra mezbûr Hasan Efendi menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin on üç buçuk esedî guruşa bana îcâr, ben dahi vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: Esad b. Mahmud, Ahmed Çavuş nâzır-ı vakf, Mustafa b. Abdülbâkī Câbi-i vakf, Mustafa b. Ahmed, el-Hâc Mehmed b. el-Hâc Kadri, Ömer b. Davud ve gayruhüm.