İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 267 Hüküm no: 239 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsâ b. Abdullah’ın vârisleri Hasan Çelebi ve Fâtıma arasında anlaşma sağlandığı Mahmiye-i İstanbul’da Karabaş mahallesinde sâkin iken bundan akdem vefât eden İsâ b. Abdullah nâm kimesnenin verâseti, sulbî kebîr oğlu Hasan Çelebi ile sulbiye kebîre kızı Fâtıma nâm hâtuna münhasır olduğu şer‘an sâbit oldukdan sonra zâtı ma‘rifet-i şer‘iyye ile ârifân İmâm Hasan Efendi b. Mustafa ve Hasan Ağa b. Mustafa nâm kimesneler ta‘rîfleri ile mu‘arrefe olan mezbûre Fâtıma Hâtun meclis-i şer‘-i şerîfde li ebeveyn karındaşı ve tereke-i müteveffâ-yı mezbûra vâzı‘ü’l-yed olan bâ‘is-i hâze’l-kitâb mezbûr Hasan Çelebi mahzarında ikrâr ve takrîr-i kelâm edip babamız müteveffâ-yı mezbûrun terekesinden olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd büyût-ı adîdeyi müştemil mülk menzilden ve sâir muhallefâtından üç sehimden bi’l-irsi’ş-şer‘î bana isâbet eden bir sehim hisse-i şer‘iyyem mukābelesinde, şerâit-i hüccet-i sulhü hâvî mevâni‘-i müfsideden ârî bi tarîki’t-tehârüci’ş-şer‘î nukūd-ı terekeden hissemden ezyed beş esedî guruş ile menzil-i mezbûrun kıble tarafında vâki‘ bir bâb tahtânî oda üzerine karındaşım mezbûr Hasan Çelebi ile sulh olup bedel-i sulh olan meblağ-ı mezbûr beş esedî guruş ile mârrü’z-zikr odayı karındaşım mezbûr Hasan Çelebi yedinden ahz u kabz ettiğimden sonra mûrisimiz müteveffâ-yı mezbûrun muhallefâtına müte‘allika cemî‘ de‘âvî ve eymân [ve] mütâlebâtdan karındaşım mezbûr Hasan Çelebi’nin zimmetini ibrâ-i âmm-ı kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Efendi b. Şaban, Yusuf Efendi b. Mehmed, Mehmed Çelebi b. Hasan, berber Mehmed Çelebi b. Şaban, Muharrem Beşe b. Şaban, Ali b. Abdullah, keçeci İbrahim Çelebi b. Ahmed, Mahmud Çelebi b. ( ).