İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 268 Hüküm no: 242 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hanım bt. Mustafa Paşa’nın Üsküp’teki hayvan ve arazilerini Abdülkadir b. Muhyiddin’e sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden irsâl olunan Mevlânâ Abdülaziz Efendi b. Hüseyin hâlâ mesned-nişîn-i sadr-ı Anadolu olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî alîmü’l-ilm ve’l-hüdâ menârü’l-fazl ve’t-tükā sa‘âdetlü Mustafa Efendi hazretlerinin Dârü’l-hilâfeti’l-aliyye Kostantıniyye el-mahmiye Tevkī‘î Cafer Çelebi mahallesinde vâki‘ sa‘âdet-hânelerine varıp zeyl-i sahîfede muharrerü’l-esâmî olan müslimîn huzûrunda akd-i meclis-i şer‘-i şerîf eyledikde mahmiye-i mezbûrede Tercüman Yunus mahallesi sâkinelerinden mefharü’l-muhadderât zübdetü’l-muvakkarât Fâtıma Hanım bt. el-merhûm Mustafa Paşa tarafından husûs-ı âti’l-beyâna vekîl olduğu zâtını ma‘rifet-i şer‘le ârifân zikr olunan Tevkī‘î Cafer Çelebi mahallesi ahâlîsinden Sofu Mehmed Efendi b. Mustafa ve mûmâ-ileyh Mustafa Efendi hazretlerinin çukadârı el-Hâc Mehmed Beşe b. Hüseyin nâm kimesneler şehâdetleri ile şer‘an sâbit olan mefharü’l-mehâdîmü’l-kirâm Mehmed Çelebi b. el-merhûm Ali Efendi meclis-i ma‘kūd-ı merkūmda, vilâyet-i Rumeli’nde medîne-i Üsküp ahâlîsinden sâhib-i hâze’l-kitâb fahrü’l-akrân Abdülkādir Çelebi b. Muhyiddin mahzarında ikrâr ve takrîr-i kelâm edip akd-i âti’z-zikrin sudûruna değin müvekkilem mûmâ-ileyhâ Fâtıma Hanım’ın taht-ı tasarrufunda olup medîne-i mezbûre kurbunda vâki‘ Kadri Efendi çiftliği demekle ma‘rûf çiftlik ta‘bîr olunur menzil içinde mevcûd mülkü olan üç çift kara sığır öküzü ve iki kara sığır ineğini ve iki kısrak ve bir aygır at ve iki araba ve üç saban ve yüz keyl-i İstanbulî buğday ve elli keyl-i İstanbulî şa‘îr ve elli keyl-i İstanbulî cevi bi safkatin vâhidetin yüz esedî guruşa merkūm Abdülkādir Çelebi’ye vekâlet-i mahkiyem hasebiyle bey‘ ve çiftlik-i mezkûra teba‘iyyetle zirâ‘at olunup Havâss-ı hümâyûn toprağında mevâzi‘-i müte‘addide[de] vâki‘ senede iki yüz akçe mukāta‘ası olan ma‘lûmü’l-hudûd ve ma‘dûdü’l-kıt‘a altmış gırbâl tohum istî‘âb eder arâzinin ve altmış araba giyâhı hâsıl olur çayırlığın hakk-ı tasarruflarını dokuz yüz guruş bedel mukābelesinde ve izin ve ma‘rifet-i sâhib-i arz ile ferâğ ve tefvîz ol dahi vech-i muharrer üzre mârrü’z-zikr devâb [ve] eşyâyı iştirâ ve arâzi ve çayırlığı tefevvüz ve kabûl ettiğinden sonra ve semen-i mezbûr yüz guruş ve bedel-i merkūm dokuz yüz guruş, cem‘an bin esedî guruşu işbu meclisde bana edâ ve teslîm ben dahi yedinden ahz u kabz edip mârrü’z-zikr devâb [ve] eşyâ ve arâzi ve çayırlığı mahallerinde zabt ve tasarrufa merkūm Abdülkādir Çelebi’yi taslît eyledim dedikde merkūm Abdülkādir Çelebi mukırr-ı merkūm Mehmed Çelebi’yi cemî‘ kelimâtında tasdîk ve tahkīk etmeğin husûs-ı mezbûru Mevlânâ-yı mezbûr mahallinde tahrîr edip ve ma‘an irsâl olunan Durmuş b. Pîr Veli ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fî selhi Saferi’l-hayr li sene seb‘a ve semânîn ve elf. Şuhûdü’l-hâl: Mefharü’l-müderrisînü’l-kirâm Müminzâde Mehmed, Mefharü’l-mevâli’l-izâm Abdullah Efendi eş-şehîr Ferâyîzâde, Fahrü’l-eimmeti’l-kirâm es-Seyyid Abdülaziz Efendi, Mefharü’l-kuzâti’l-müteşerri‘în el-Hâc Ahmed b. Ali, Mehmed Efendi b. Habib, el-Hâc Mehmed b. İdris, el-Hâc Halil b. el-Hâc Ali ve gayruhüm.