İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 273 Hüküm no: 246 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borçlu Mustafa b. Yusuf’un alacaklısıyla sulh olunduğu Mahmiye-i İstanbul’da Kovacı Dede mahallesi sâkinlerinden ( ) Bey b. Veli nâm kimesne meclis-i şer‘-i şerîfde bâ‘is-i hâze’l-kitâb Mustafa b. Yusuf nâm kimesne mahzarında ikrâr ve takrîr-i kelâm edip mezbûr Mustafa’ya on esedî guruş nakid ve mecmû‘u otuz guruş kıymetli beynimizde ma‘lûm esvâbımı sana bi tarîki’l-emâne vaz‘ ve teslîmetmiş idim deyû mezbûr Mustafa’dan bundan akdem da‘vâ ve taleb ettiğimde ol dahi inkâretmiş idi el-hâletü hâzihî mezbûr Mustafa ile beynimizde muslihûn tavassut edip on üç esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağı on üç esedî guruşumu yedinden tamâmen ahz u kabz eyledim ba‘de’l-yevm husûs-ı mezbûra müte‘allika âmme-i da‘vâdan mezbûr Mustafa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Efendi b. Receb, Ahmed Efendi b. İsmail, Mehmed Halîfe el-Müezzin, Mustafa Çavuş el-Mübâşir, Ali Ağa b. Süleyman, İbrahim b. Abdullah, Yusuf b. Abdullah, Ahmed Efendi b. İsmail, Mehmed Çelebi b. Osman ve gayruhüm.