İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 273 Hüküm no: 245 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canbazlar Hasan b. Mehmed, Receb b. Abdullah ve Ramazan b. Yusuf’un, Harâccı Muhyiddin mahallesinden Sefer’e borçları olduğu Mahmiye-i İstanbul’da Harâccı Muhyiddin mahallesi sâkinlerinden bâ‘is-i hâze’l-kitâb Sefer b. Hüseyin nâm kimesne meclis-i şer‘-i şerîfde mahmiye-i mezbûrede Ebâ Eyyûb-i Ensârî kapısı dâhilinde Koca Mustafa Paşa mahallesi sâkinlerinden olup canbâz tâ’ifesinden şerîkler olan Hasan b. Mehmed ve Receb b. Abdullah ve Ramazan b. Yusuf ve Mehmed b. Cafer nâm kimesneler mahzarlarında üzerlerine da‘vâ ve takrîr-i kelâm edip mezbûrûn Hasan ve Receb ve Ramazan ve Mehmed zimmetlerinde bundan akdem yedimden ale’l-iştirâki’s-seviy iştirâ ve kabz ettikleri altı re’s bârgir bahâlarından doksan dört guruş hakkım olmağla hâlâ mezbûrûna suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl mezbûrûn Hasan ve Receb ve Ramazan ve Mehmed cevâblarında, kaziyye minvâl-i muharrer üzre olup zikr olunan altı re’s bârgir bahâlarından zimmetlerinde müdde‘î-i mezbûra doksan dört guruş vâcibü’l-edâ ve lâzımü’l-kazâ deynleri olduğunu her biri tâyi‘an ikrâr ve i‘tirâf etmeğin mûcebince meblağ-ı mezbûr doksan dört guruşu müdde‘î-i mezbûr Sefer’e edâ ve teslîme mezbûrûna tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Mehmed b. Ali, el-Hâc Mehmed b. Eyyûb, Musa Halîfe b. Receb, Mustafa Beşe b. Abdullah, İbrahim Çelebi b. Mehmed ve gayruhüm.