İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 274 Hüküm no: 248 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Mehmed’in at sattığını ve karşılığını alamadığını beyan ettiği davada iddiasını ispat edemediği Mahmiye-i Edirne mahallâtından Mirşah mahallesi sâkinlerinden olup hâlâ mahmiye-i İstanbul’da sâkin Osman b. Ali nâm kimesne meclis-i şer‘-i şerîfde işbu râfi‘ü’l-vesîka Hasan b. Mehmed nâm kimesne mahzarında üzerine da‘vâ ve takrîr-i kelâm edip mezbûr Hasan’a târih-i kitâbdan üç ay mukaddem mahrûse-i Edirne’de Atpazarı’nda iki re’s kır iğdiş bârgiri otuz iki guruşa ve bir def‘a dahi iki re’s doru iğdiş bârgiri otuz beş guruşa, min haysi’l-mecmû‘ dört re’s bârgiri yetmiş yedi guruşa bey‘ ve teslîm ol dahi iştirâ ve tesellüm ve kabz etmiş idi hâlâ semenleri olan meblağ-ı mezbûr yetmiş yedi guruşu mezbûr Hasan’dan suâl olunup alıverilmesi matlûbumdur dedikde gıbbe’s-suâl ve akībe’l-inkâr, müdde‘î-i mezbûrdan takrîr-i meşrûhuna mutâbık beyyine taleb olundukda ityân-ı beyyineden izhâr-ı acz etmeğin mezbûr Hasan’a müdde‘î-i mezbûrun mahrûse-i mezbûrda zikr olunan dört re’s bârgirini yetmiş [yedi] esedî guruşa iştirâ ve kabz etmeyip elân üzerine red ve zamândan bir nesne lâzım olmadığına yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr Osman bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Rebî‘ilâhir li sene seb‘a ve semânîn ve elf. Şuhûdü’l-hâl: Ebûbekir b. Hüseyin, Hasan Çelebi b. Ahmed, Mahmud Çelebi b. Şaban ve gayruhüm.