İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 275 Hüküm no: 249 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in değirmenini Ali Bey b. Ahmed’e sattığı Mahmiye-i İstanbul’da Ali Paşa-yı Atîk mahallesi sâkinelerinden Ayşe bt. Mehmed nâm hâtunun zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sâkinlerinden Mehmed Halîfe b. Musa ve Yahya b. Mehmed nâm kimesneler şehâdetleri ile şer‘an sâbit olan Mustafa b. Hüseyin nâm kimesne meclis-i şer‘de, bâ‘isü’l-kitâb Ali Bey b. Ahmed nâm kimesne mahzarında ikrâr ve takrîr-i kelâm edip vilâyet-i Anadolu’da Hüdâvendigâr sancağında Tophisar nâhiyesine tâbi‘ Keçili nâm karyede vâki‘ Karadağ suyu ile dâir küçük değirmen demekle ma‘rûf senede altmış akçe mukāta‘ası olan değirmen arsası, müvekkilem mezbûre Ayşe’nin taht-ı tasarrufunda olmağla hâlâ zikr olunan değirmen arsasının hakk-ı tasarrufunu on beş esedî guruş bedel mukābelesinde ma‘rifet-i sâhib-i arz ile merkūm Ali Bey’e bi’l-vekâle ferâğ ve tefvîz ol dahi tefevvüz ve kabûl ettiğinden sonra bedel-i merkūm on beş guruşu bana teslîm ben dahi yedinden ahz u kabz edip zikr olunan değirmen arsasına mahallinde zabt ve tasarrufa merkūm Ali Bey’e taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Saferi’l-hayr li sene seb‘a ve semânîn ve elf. Şuhûd[ü’l-hâl]: Ahmed b. Bâli, İbrahim b. Mehmed, Osman [b.] Ömer, Hüseyin b. Ebûbekir, Veli b. Mahmud.