İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 278 Hüküm no: 253 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mustafa Ağa b. Ramazan’ın Ali Ağa b. Hasan’a verdiği eşyaları geri aldığı Vilâyet-i Rumeli’nde Karinâbâd kasabası ahâlîsinden olup hâlâ mahmiye-i İstanbul’da Keçe[ci] Pîrî mahallesinde bi tarîki’l-müsâfere sâkin el-Hâc Mustafa Ağa b. Ramazan nâm kimesne meclis-i şer‘-i şerîf-i lâzımü’t-tevkīrde bâ‘is-i hâze’l-kitâb Ali Ağa b. Hasan nâm kimesne mahzarında ikrâr ve takrîr-i kelâm edip eşyâ-i memlûkemden beynimizde ma‘lûm bir Macar tüfengi ile bir eğer ma‘a teğeleti ve üzengi ve bir re’s demir kır kısrak ve bir don ve bir gömleğimi mezbûr Ali Ağa’ya mukaddemâ îdâ‘ ve teslîm ol dahi yedimden istibdâ‘ ve kabz ettiğinden sonra mezbûr Ali Ağa zikr olunan tüfenk ve eğer ve teğeleti ve kısrağı bundan akdem gāib ani’l-meclis Mustafa b. Abdullah nâm kimesne ile bana irsâl, ben dahi sâlifü’z-zikr eşyâyı mezbûr Mustafa yedinden ahz u kabz etmiş idim hâlâ zikr olunan don ve gömleği dahi mezbûr Ali Ağa yedinden ahz u kabz edip eşyâ-i mezbûreye müte‘allika cemî‘ da‘vâdan mezbûr Ali Ağa’nın zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb ve imlâ olundu. Fi’l-yevmi’t-tâsi‘ ve’l-ışrîn min Saferi’l-hayr li sene seb‘a ve semânîn ve elf min hicreti men lehü’l-izzi ve’ş-şeref. Şuhûdü’l-hâl: İbrahim Çelebi b. Ahmed, Osman b. Ömer, İbrahim Çelebi b. ( ), Ebûbekir b. Hüseyin, Mehmed b. ( ), Mahmud b. İsmail ve gayruhüm.