İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 277 Hüküm no: 252 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Ermeni Patriği Andriyos v. Avraham’ın İsmail Beşe b. Osman’a olan borcunu ödemesi gerektiği Dergâh-ı âlî yeniçerilerinden otuz dokuzuncu cemâ‘atine mahsûs oda yoldaşlarından bâ‘is-i hâze’l-kitâb İsmail Beşe b. Osman nâm kimesne meclis-i şer‘de, sâbıkan Ermeni patriki olan Kara Cehennem demekle ma‘rûf Andriyos v. Avraham nâm râhib muvâcehesinde üzerine da‘vâ ve takrîr-i kelâm edip mezbûr Andriyos zimmetinde bundan akdem yedimden bi safkatin vâhidetin iştirâ ve kabz eylediği beynimizde ma‘lûm bir tüfenk ve bir sîm raht ve bir gömlek ve iki makrama bahâlarından seksen guruş ve iktirâz ve kabz eylediği nakid dört yüz guruş min haysi’l-mecmû‘ mezbûr Andriyos zimmetinde hakkım olan dört yüz guruşu bâkī kalmışdı hâlâ mezbûr Andriyos’a suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûr Andriyos cevâbında müdde‘î-i mezbûr yedinden zikr olunan tüfenk ve raht ve gömlek ve makramaları gabn-ı fâhiş ile yüz altmış guruşa iştirâ ve kabz edip ve nakid ancak üç yüz yirmi guruş iktirâz ve kabz ettiğimden sonra müdde‘î-i mezbûra meblağ-ı mezbûrdan kabzını i‘tirâf ettiğini meblağ-ı mezbûr seksen guruşdan mâ‘adâ yirmi guruş dahi edâ ve teslîm etmiş idim deyû def‘le mukābele edicek gıbbe’l-istintâk ve’l-inkâr mezbûr Andriyos’dan def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-i mezbûr İsmail Beşe’ye meblağ-ı mezbûr yirmi guruşu dahi müdde‘î-i mezbûr yedinden ahz u kabz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ edip ve mezbûr Andriyos zikr olunan tüfenk ve raht ve gömlek ve makramaları gabn-ı fâhiş ile yüz altmış guruşa iştirâ etmiş idim deyû bilâ-tağrîr gabn mesmû‘ olmamağın i‘tirâfı mûcebince meblağ-ı bâkī-i mezbûr dört yüz guruşu müdde‘î-i mezbûra edâ ve teslîme mezbûr Andriyos’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc Mehmed b. Ali, el-Hâc Mehmed Receb, Musa Halîfe b. Receb, Mustafa Beşe b. Abdullah, İbrahim b. Mehmed ve gayruhüm.