İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 279 Hüküm no: 255 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Afife bt. Mehmed Efendi’nin kölesi Rus asıllı Mirza b. Abdullah’ı azat ettiği Husûs-ı âti’l-beyânın mahallinde tahrîr iltimâs olunmağın kıbel-i şer‘den Mevlânâ Abdullah Efendi b. Veli irsâl olunup ol dahi Âbid Çelebi mahallesinde sâkin İmâm Mehmed Efendi b. Süleyman nâm kimesnenin sâkin olduğu menziline varıp zeyl-i rakīmde muharrerü’l-esâmî olan müslimîn huzûrlarında ma‘rifet-i şer‘iyye ile ârifân mahalle-i mezbûrede akd-i meclis-i şer‘-i mübîn eyledikde merkūm Mehmed Efendi’nin müste’ciri olup zâtı falan ve fülân ta‘rîfleriyle mu‘arrefe olan Şerife Afîfe bt. Mehmed Efendi nâm hâtun meclis-i ma‘kūd-ı mezbûrda ikrâr-ı tâm ve takrîr-i kelâm edip bana rıkkını mu‘terif olan işbu orta boylu, sarı açık kaşlı, gök ala gözlü, Rûsî bâ‘is-i hâze’l-kitâb Mirza b. Abdullah nâm abd-i memlûkümü hasbeten lillâhi te‘âlâ ve taleben li merzâti’r-rabbi’l-a‘lâ malımdan tahrîr ve i‘tâk ve zümre-i ahrâr-ı asliyyeye [63b] idrâc ve ilhâk eyledim ba‘de’l-yevm mevsûf-ı mezbûr Mirza sâir ahrâr-ı asliyyîn gibi hür olup üzerinde hakk-ı velâdan gayrı hakkım kalmadı dedikde vâki‘ hâli Mevlânâ-yı mezbûr mahallinde ketb ve terkīm ve ma‘an irsâl olunan Kara Mustafa b. Şaban ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb [olundu]. Fi’l-yevmi’s-sânî min Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. İbrahim, Ahmed Beşe b. Ali, Osman Çelebi b. Abdullah, İbrahim Beşe b. Hasan, İbrahim Beşe b. Osman, Mehmed Beşe b. İbrahim, Sâlih Çelebi b. Osman, çavuş Mustafa Çelebi b. Ali, Yusuf b. Abdullah, İbrahim b. Kadri ve gayruhüm.