İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 280 Hüküm no: 256 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Abdullah’ın vârislerinden Ahmed Çelebi b. Hüseyin’in miras malından hakkı olan kısmı aldığı Mahmiye-i İstanbul’da Sultan Bayezid-i cedîd mahallesi sâkinelerinden iken bundan akdem vefât eden Ümmühâni bt. Abdullah nâm hâtunun verâseti, zevc-i metrûkü Ahmed Çelebi b. Hüseyin nâm kimesne ile mu‘takı Şuayb Çelebi b. Abdullah nâm kimesneye münhasıra ve tashîh-i mes’elesi iki sehimden olup sihâm-ı mezbûreden bir sehmi mezbûr Ahmed Çelebi’ye ve bir sehmi dahi mezbûr Şuayb Çelebi’ye isâbet ettiği şer‘an zâhir ve mütehakkik oldukdan sonra mezbûr Ahmed Çelebi meclis-i şer‘-i şerîfde müteveffât-ı mezbûrenin muhallefâtına vâzı‘ü’l-yed olan bâ‘is-i hâze’l-kitâb mezbûr Şuayb Çelebi tarafından husûs-ı âti’l-beyâna vekîl olduğu mahmiye-i mezbûrede Nerdübanlı Mescid mahallesi sâkinlerinden Mehmed Efendi b. Ali ve es-Seyyid Musa Çelebi b. Ali nâm kimesneler şehâdetleri ile şer‘an sâbit olan İbrahim Ağa b. Mustafa nâm kimesne mahzarında ikrâr ve takrîr-i kelâm edip müteveffât-ı mezbûrenin muhallefâtından olup mahmiye-i mezbûrede Mirahor mahallesinde vâki‘ lede’l-ahâlî ve’l-cîrân ma‘lûmü’l-hudûd büyût-ı adîdeyi müştemil menzil semen-i misli ile âhara bey‘ olunmağla semeninden mezbûr Şuayb Çelebi’nin makbûzu olan yüz elli esedî guruşdan ber vech-i muharrer bana isâbet eden yetmiş beş esedî guruş hisse-i şer‘iyyemi ve kezâlik müteveffât-ı mezbûrenin Canfeda nâm câriyesi semeninden makbûzu olan yetmiş esedî guruşdan dahi vech-i muharrer üzre bana isâbet eden otuz beş esedî guruşu ve evânî-i nühâsiyye ve gayr-i nühâsiyye ve sâir beynimizde ma‘lûm eşyâ semenlerinden dahi kezâlik mezbûr Şuayb Çelebi’nin makbûzu olan yirmi bin akçeden dahi ber vech-i muharrer bana isâbet eden on bin akçeyi, min haysi’l-mecmû‘ mezbûr Şuayb Çelebi’nin makbûzu olan kırk altı bin dört yüz akçeden vech-i muharrer üzre bana isâbet eden cem‘an yirmi üç bin iki yüz akçe hisse-i şer‘iyyemi müvekkil-i mezbûr Şuayb Çelebi bana edâ ve teslîm ben dahi yedinden tamâmen ahz u kabz ettiğimden sonra müteveffât-ı mezbûrenin terekesine müte‘allika âmme-i da‘vâdan müvekkil-i mezbûr Şuayb Çelebi’nin zimmetini ibrâ-i âmm-ı kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Ahmed Çelebi b. Hasan, İbrahim Çelebi el-Müezzin, Osman Çelebi b. Abdullah, Mehmed Çelebi eş-Şâhin, Hacı Mahmud b. İbrahim, Mustafa b. İbrahim, Mahmud Çelebi b. ( ) ve gayruhüm.