İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 300 Hüküm no: 277 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Çavuş b. İsmail’in vefat eden hanımı tarafından Ali Ağa b. Osman’a satılan câriye konusunda anlaştıkları Mahmiye-i İstanbul’da Akşemseddin mahallesinde sâkin olup dergâh-ı âlî yeniçerilerinin otuz üçüncü bölük çavuşlarından Derviş Çavuş b. İsmail nâm kimesne meclis-i şer‘-i şerîfde sâbıkan sakabaşı olan bâ‘is-i hâze’l-kitâb fahrü’l-akrân Ali Ağa b. Osman tarafından husûs-ı âti’l-beyâna vekîl olduğu el-Hâc Halil b. İbrahim ve Hamza Beşe b. Ali nâm kimesneler şehâdetleri ile şer‘an sâbit olan es-Seyyid Mehmed Efendi b. İbrahim nâm kimesne mahzarında ikrâr ve takrîr-i kelâm edip yedimde mülk ve hakkım olup evsâfı beynimizde ma‘lûm İvaz nâm câriyemi bundan akdem vefât eden zevcem Ayşe nâm hâtun hayâtında ben gāib iken iki yüz altmış guruş semen-i makbûza müvekkil-i mezbûr Ali Ağa’ya fuzûlen bey‘ ve teslîm ol dahi ber vech-i muharrer iştirâ ve tesellüm ettiğinden sonra ben dahi mârrü’z-zikr câriyemi mezbûr Ali Ağa’dan da‘vâ ve taleb eylediğimde, ol dahi sâlifü’z-zikr câriye müteveffât-ı mezbûre Ayşe’nin mülkü olup hayâtında ber vech-i muharrer bana bey‘ ve teslîm edip mülk-i müşterâm olmağla vaz‘-ı yed ederim deyû mezbûre câriyenin ber vech-i muharrer mülküm olduğunu inkâr ve bana red ve teslîmden imtinâ‘ etmeğin beynimizde nizâ‘-ı küllî vukū‘undan sonra muslihûn tavassut edip mezbûr Ali Ağa ile beynimizde kırk bir esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr kırk bir esedî guruşu mezbûr Ali Ağa yedinden tamâmen ahz u kabz eylediğimden sonra zikr olunan câriyeye müte‘allika cemî‘ de‘âvî ve mütâlebâtdan ben mezbûr Ali Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt edip ve mezbûr Ali Ağa dahi bedel-i sulh-ı mezbûre ve câriye-i mezkûrenin semeni olan meblağ-ı mezbûre müte‘allika âmme-i de‘âvî ve muhâsamâtdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdullah Efendi b. Şeyh Ahmed el-İmâm, Halil Çelebi b. el-Müezzin, Mehmed Efendi el-İmâm, el-Hâc Mehmed b. Mustafa, el-Hâc İsmail b. Hasan, el-Hâc Receb b. Mustafa, berber Mehmed b. Şaban, Mustafa Beşe b. Yunus, Terzi Ahmed b. ( ), İzmirli Mahmud Beşe ve gayruhüm.