İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 300 Hüküm no: 276 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Osman’ın Ebûbekir Beşe b. Osman’da katır bedelinden alacağı olduğu Vilâyet-i Anadolu’da Kangırı sancağında Bucura kazâsından olup hâlâ mahmiye-i İstanbul’da Katır hanı’nda bi tarîki’l-müsâfire sâkin bâ‘is-i hâze’l-vesîka Mustafa b. Osman nâm kimesne meclis-i şer‘-i şerîfde li ebeveyn karındaşı Ebûbekir Beşe b. Osman kimesne mahzarında üzerine da‘vâ ve takrîr-i kelâm edip târih-i kitâbdan bir sene mukaddem mezbûr Ebûbekir Beşe yedimde mülküm olan elli guruş kıymetli bir esb katırımı fuzûlen ahz u kabz ve âhara bey‘ ile istihlâk eylemekle, hâlâ suâl olunup zikr olunan katırın kıymeti olan meblağ-ı mezbûru bana teslîme mezbûr Ebûbekir Beşe’ye tenbîh olunmak matlûbumdur dedikde gıbbe’s-suâl mezbûr Ebûbekir Beşe cevâbında fi’l-hakīka kaziyye vech-i muharrer üzre olup müdde‘î-i mezbûrun yedinde mülkü ve hakkı olan mârrü’z-zikr katırını fuzûlen kabz ve âhara bey‘ ve istihlâk eylediğini ve kıymeti ancak on yedi esedî guruş ile üç rub‘ olduğunu bi’t-tav‘i’s-sâf ikrâr ve i‘tirâf edip kıymetinden ziyâdeyi inkâr etmeğin müdde‘î-i mezbûrdan ziyâde da‘vâsıyçün beyyine taleb olundukda ityân-ı beyyine için istimhâl etmekle mehl-i şer‘î ile imhâl olundukdan sonra mezbûr Ebûbekir Beşe’nin ikrârı mertebesi olan meblağ-ı mezbûr on yedi esedî guruş ile üç rub‘u müdde‘î-i mezbûre edâ ve teslîme merkūm Ebûbekir Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Kara Mustafa b. Şaban, Musa b. Abdünnebi, Mustafa b. Abdi, Osman Beşe b. Ömer, İsmail Çelebi ve gayruhüm.