İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 302 Hüküm no: 279 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ünzile bt. Bâli’nin evini oğlu Osman b. Hüseyin’e sattığı Mahmiye-i İstanbul’da Camcı Çeşmesi mahallesi sâkinelerinden olup zâtı ma‘rifet-i şer‘iyye ile ârifân Zeynelabidin b. Mehmed ve Ali Bey b. İsâ nâm kimesneler ta‘rîfleri ile mu‘arrefe olan Ünzile bt. Bâli nâm hâtun meclis-i şer‘-i şerîfde sadrî oğlu bâ‘is-i hâze’l-kitâb Osman b. Hüseyin nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezbûrede vâki‘ bir tarafdan Nikola nâm zimmî mülkü ve iki tarafdan Ahmed Çelebi mülkü ve bir tarafdan tarîk-i âm ile mahdûd, fevkānî bir bâb oda ve bir sofa ve tahtânî kenîfi müştemil menzilimi, cümle tevâbi‘ ve levâhıkı ile oğlum mezbûr Osman’a elli esedî guruşa bey‘ ve teslîm ol dahi iştirâ ve tesellüm ettiğinden sonra semen-i mezbûr elli guruşu bana edâ ve teslîm ben dahi yedinden ahz u kabz eyledim ba‘de’l-yevm menzil-i mezbûr oğlum mezbûr Osman’ın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Rebî‘ilevvel li sene seb‘a ve semânîn ve elf. Şuhûdü’l-hâl: Zeynelabidin b. Mehmed, Ali Bey b. İsâ, Ömer Bey b. Receb, Murad Bey b. Abdurrahman, Osman Bey b. Mustafa ve gayruhüm.