İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 302 Hüküm no: 280 Orijinal metin no: [71a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Hüseyin’in boşandığı eşi Mehmed b. Ahmed’in zimmetini ibrâ ettiği Mahmiye-i İstanbul’da Atmeydanı kurbunda Fîrûz Ağa mahallesi sâkinelerinden Râbia bt. Hüseyin nâm hâtun mahfil-i kazâda, zevc-i dâhili bâ‘is-i hâze’l-kitâb Mehmed b. Ahmed nâm kimesne mahzarında ikrâr ve takrîr-i kelâm edip zevcim mezbûr Mehmed beni talâk-ı bâyin ile tatlîk edip zimmetinde mütekarrir ve ma‘kūdun-aleyh olan mehr-i müeccelim iki bin iki yüz akçe ve nafaka-i iddet-i ma‘lûmem ve me’ûnet-i süknâm bedeli beş yüz akçe semeneyn-i mezbûrdan cem‘an iki bin yedi yüz akçeyi ve eşyâ-i memlûkesinden iki keten tarağı ve iki ferâce ve bir yorgan ve bir köhne kapama ve bir kırmızı yorgan kaplı kuzu kürk ve bir çıkrık ve bir ocak perdesini bana def‘ ve teslîm ben dahi yedinden ahz u kabz edip ba‘de’l-yevm hukūk-ı zevciyyete müte‘allika âmme-i de‘âvâdan ben zevcim mezbûr Mehmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt edip ol dahi meblağ-ı mezbûr iki bin yedi yüz akçe ve eşyâ-i mezkûreye müte‘allika de‘âvâdan benim zimmetimi ibrâ ve iskāt etti dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim b. Mustafa el-İmâm, diğer İbrahim b. Abdullah, el-Hâc Ahmed b. Abdullah, Mehmed b. Hüseyin, Şaban b. Mustafa, Osman Beşe b. Ömer ve gayruhüm.