İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 307 Hüküm no: 285 Orijinal metin no: [72b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Edirne iç ağalarından Ali Ağa b. Kulu’nun Hüseyin Beşe b. Mehmed’de olan eşyaları ile erzak bedelini vârislerinin teslim aldığı Vilâyet-i Anadolu’da Engürü nâm kasabaya tâbi‘ Alagöz nâm karye ahâlîsinden olup medîne-i Edirne’de İç ağalarından iken vefât eden Ali Ağa b. Kulu nâm kimesnenin verâseti, li ebeveyn er karındaşı Hüseyin Beşe nâm kimesne ile kız karındaşı Satı nâm hâtuna münhasıra olduğu şer‘an mütehakkik oldukdan sonra mezbûr Hüseyin Beşe kendi tarafından asâleten ve mezbûr Satı nâm hâtun tarafından husûs-ı âti’l-beyâna vekîl olduğu eş-Şeyh Ahmed Efendi b. Hamza ve Mustafa Halîfe b. Hızır nâm kimesneler şehâdetleri ile şer‘an sâbit olmağla vekâleten meclis-i şer‘-i şerîfde bâ‘is-i hâze’l-kitâb diğer Hüseyin Beşe b. Mehmed nâm kimesne mahzarında ikrâr ve takrîr-i kelâm edip mûrisimiz müteveffâ-yı mezbûr Ali Ağa hayâtında eşyâ-i memlûkesinden beş kilim ve bir Acem kumaşı döşemesi ve bir kırmızı ferâce ve bir kırmızı kontoş ve bir güğüm ve bir sandık ve beynimizde ma‘dûdu ma‘lûm bal ve yağ ve pirinci ve sâir beynimizde ma‘lûm eşyâsını mezbûr diğer Hüseyin Beşe’ye îdâ‘, ol dahi istîdâ‘ ve tesellüm ettiğinden sonra kable’l-ahz vefât edip eşyâ-i mezkûre merkūm diğer Hüseyin Beşe yedinde kalmağın hâlâ sâlifü’z-zikr eşyâ-i mezbûru diğer Hüseyin Beşe yedinden asâleten ve vekâleten ahz u kabz edip ve mârrü’z-zikr bal ve yağ ve pirinç mukābelesinde dahi rızâmız ile mezbûr diğer Hüseyin Beşe yedinden on esedî guruş ahz u kabz eylediğimden sonra eşyâ-i mezbûreye müte‘allika cemî‘ de‘âvî ve mütâlebâtdan asâleten ve vekâleten mezbûr diğer Hüseyin Beşe’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: İsmail Odabaşı b. Mustafa, İsmail b. Hüseyin, Abdi Bey b. Abdullah, Mustafa b. Ali el-Muhzır, eş-Şeyh Ahmed Efendi, Himmet Mustafa b. Hızır