İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 306 Hüküm no: 284 Orijinal metin no: [72b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havvâ bt. Kenan’ın eşi İvaz Beşe b. Abdullah’tan boşandığı Mahmiye-i İstanbul’da Tülbentçi Hüsam mahallesi sâkinlerinden iken bundan akdem vefât eden ağa babası Kenan Ağa nâm kimesnenin sulbiye sagīre kızı Havvâ’nın vâlidesi ve tesviye-i umûruna kıbel-i şer‘den mansûbe vasîsi olan Şakire bt. Abdullah nâm hâtun zâtı ma‘rifet-i şer‘iyye ile ârifân İbrahim Ağa b. Hüseyin ve Mustafa Bey b. Mehmed nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde sagīre-i mezbûre Havvâ’nın zevc-i dâhili râfi‘ hâze’l-kitâb İvaz Beşe b. Abdullah nâm kimesne mahzarında ikrâr ve takrîr-i kelâm edip sagīre-i mezbûre Havvâ’nın zevci mezbûr İvaz Beşe zimmetinde mütekarrir ve ma‘kūdun-aleyh olan on bin akçe mehr-i müeccelini zâmine olmak üzre mezbûr İvaz Beşe ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eyledi dedikde gıbbe’t-tasdîki’ş-şer‘î mezbûre Şakire’nin nefsine ve hîn-i mütâlebede meclis-i şer‘de ihzârına tarafeynden emir ve kabûlü hâviye kefâlet ile mezbûr İbrahim Ağa kefîl olmağın mâ vaka‘a bi’t-taleb ketb olundu. Fi’l-yevmi’s-sâlis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Çavuş b. Ali, Yusuf Çavuş b. Abdullah, Mustafa Efendi b. Mehmed, Halil b. Mehmed, Mustafa Efendi b. Ali el-İmâm, İbrahim Çelebi b. Sâlih, el-Hâc Ali b. Ahmed, Rıdvan Bey b. Abdullah, Mehmed Ağa b. Rıdvan, Hüseyin Ağa b. ( ) ve gayruhüm.