İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 308 Hüküm no: 288 Orijinal metin no: [73a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kula v. Mozak’ın ev, tarla ve bahçelerini Pitso v. Pitso’ya sattığı Vilâyet-i Rumeli’nde Ohri sancağında İstarova kazâsına tâbi‘ Sağrıkaynil? nâm karye ahâlîsinden Kavla v. Mozak nâm zimmî meclis-i şer‘-i şerîfde bâ‘is-i hâze’s-sifr Pitso v. Pitso nâm zimmî tarafından husûs-ı âti’l-beyâna vekîl olduğu Mustafa Beşe b. Osman ve Ömer Beşe b. Hasan nâm kimesneler şehâdetleri ile şer‘an sâbit olan Mustafa Beşe b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup karye-i mezbûrede vâki‘ bir tarafdan Peter v. Yozak? nâm zimmî mülkü ve bir tarafdan [73b] Mustafa b. Abdullah nâm kimesne mülkü ve bir tarafdan Kigo v. Kuli nâm zimmî bağı ve bir tarafdan tarîk-i âm ile mahdûd ve mümtâz olup bir çardak ve bir kiler ve bir samanlık ve havluyu müştemil menzilin ve yine karye-i mezbûre kurbunda vâki‘ beyne’l-ahâlî ve’l-cîrân ma‘lûmü’l-hudûd iki kıt‘a bağımın ve iki kıt‘a bostanımın ve içlerinde mevcûd bir ceviz ağacının ve bir çift kara sığır öküzü ve bir tosun ve bir doru bârgirimin nısf-ı şâyi‘lerini müvekkil-i mezbûr Pitso’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi safkatin vâhide iki bin akçeye bey‘ ve temlîk ve yine tefvîz-i câ’i’z-zikrin sudûruna değin taht-ı tasarrufumda olup karye-i mezbûre kurbunda mevâzi‘-i müte‘addidede vâki‘ lede’l-ahâlî ve’l-cîrân ma‘lûmü’l-hudûd olup tahmînen kırk keyl tohum istî‘âb eder sekiz kıt‘a tarlalarımın nısf şâyi‘lerinin hakk-ı tasarruflarını sâhibü’l-arz ma‘rifetiyle bin akçeye ferâğ ve tefvîz ol dahi iştirâ ve temellük ve tefevvüz ve kabûl eylediğinden sonra semen-i mezbûr iki bin akçe ve bedel-i mezbûr bin akçe min haysi’l-mecmû‘ üç bin akçeyi müvekkil-i mezbûr Pitso yedinden tamâmen ahz u kabz edip zikr olunan emlâk ve arâzinin tasarruflarını mahallerinde zabt ve tasarrufa mezbûr Pitso’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ali b. Mehmed, Sinan b. Abdullah, Mehmed b. Abdullah, İbrahim Çelebi b. Ahmed, Ebûbekir b. Hüseyin, Osman b. Ömer, Esteraz v. Kigo, Rasto v. Yozak, Marko v. Pitso, Kayas v. Kigo ve gayruhüm.