İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 309 Hüküm no: 289 Orijinal metin no: [73b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Edhem’in arsasını İvaz Ağa b. Hızır’a sattığı Mahmiye-i İstanbul’da Molla Ahî mahallesinde sâkin Mehmed Beşe b. Edhem nâm kimesne meclis-i şer‘-i şerîf-i lâzımü’t-teşrîfde, bâ‘is-i hâze’l-kitâb İvaz Ağa b. Hızır nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Avratpazarı kurbunda el-Hâc Ahmed mahallesinde vâki‘ bir tarafdan Ahmed Bey nâm kimesne mülkü ve bir tarafdan müşterî-i mezbûr İvaz Ağa tasarrufunda olan menzil ve bir tarafdan vakıf menzil ve bir tarafdan tarîk-i âm ile mahdûd arsa-i hâliyemi, mezbûr İvaz Ağa’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile altmış esedî guruşa bey‘ ve teslîm ol dahi minvâl-i muharrer üzre iştirâ ve kabûl eylediğinden sonra semeni olan meblağ-ı mezbûr altmış esedî guruşu mezbûr İvaz Ağa yedinden tamâmen ahz u kabz edip ba‘de’l-yevm zikr olunan arsa-i hâliye mezbûr İvaz Ağa’nın mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Çelebi b. Ali, Hasan Çelebi b. Mehmed, Mehmed b. Yusuf, İbrahim Çelebi b. Mehmed, Veli Bey b. Mahmud.