İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 311 Hüküm no: 292 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf mütevellisi Halil Ağa’nın vefat eden Kerime bt. Mehmed’de bey‘ bi’l-istiğlâl yoluyla satın aldığı mülkü alacağını tahsil ettiği için mirasçısına geri verdiği Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden Mevlânâ Musa Efendi b. Mustafa irsâl olunup ol dahi Rıfâîzâde vakfının hâlâ mütevellîsi olan fahrü’l-akrân Halil Ağa b. İbrahim’in mahmiye-i İstanbul’da el-Hâc İsâ mahallesinde sâkin olduğu menziline varıp zeyl-i kitâbda muharrerü’l-esâmî olan müslimîn ve sikāt-ı muvahhidîn huzûrunda akd-i meclis-i şer‘-i mübîn eyledikde mezbûr Halil Ağa meclis-i ma‘kūd-ı merkūmda mahmiye-i mezbûrede Çerağī Hamza mahallesinde sâkin iken bundan akdem vefât eden Kerime bt. Mehmed nâm hâtunun babasının ammisi oğlunun oğlu ve usûbet-i nesebiyye cihetinden hasren vârisi olan Mustafa Çelebi b. Mehmed nâm kimesne mahzarında ikrâr ve takrîr-i kelâm edip müteveffât-ı mezbûre hayâtında bin seksen altı senesinde yedinde mülkü olup zikr olunan Çerağī Hamza mahallesinde vâki‘ bir tarafdan Servinaz Hâtun vakfı olan bahçe ve iki tarafdan Sâlih Çelebi vakfı olan odalar ve bahçe ve bir tarafdan tarîk-i âm ile mahdûd hâriciyye ve dâhiliyye fevkānî ve tahtânî büyût-ı adîdeyi ve mahzen ve su kuyusu ve havlu ve kenîfi müştemil mülk menzilini, bi tarîki’l-istiğlâl bana sekiz yüz elli guruşa bey‘ ve teslîm ben dahi iştirâ ve tesellüm eylediğimden sonra semeni olan meblağ-ı mezbûru mâl-ı vakf-ı mezbûrdan müteveffâ-yı mezbûreye tamâmen edâ ve teslîm ol dahi ahz u kabz ettikden sonra menzil-i mahdûd-ı mezkûru ba‘de’t-tahliyyeti’ş-şer‘iyye ve’t-takābuzi’l-mer‘iyye târih-i mezbûrdan bir sene tamâmına değin müteveffâ-yı mezbûreye yüz on guruşa îcâr ve teslîm ol dahi istîcâr ve tesellüm ve bir sene zabt ettiğinden sonra semen-i mezbûru ve ücret-i merkūmeyi kable’l-edâ ve feshi’l-akd vefât etmekle terekesine vâzı‘ü’l-yed olan mezbûr Mustafa Çelebi semen-i mezbûr ve ücret-i merkūmu cem‘an dokuz yüz altmış guruşu müteveffâ-yı mezbûrenin terekesinden bana edâ ve teslîm ben dahi ahz u kabz edip menzil-i mahdûd-ı mezkûru mezbûr Mustafa Çelebi’ye teslîm ol dahi kabz ve tesellüm eyledi dedikde gıbbe’t-tasdîki’ş-şer‘î husûs-ı mezbûru mevlâ[nâ]-yı mezbûr mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm Abdülhalim Efendi, Fahrü’l-kuzât Sefer Efendi b. Siyami, Ali Beşe b. Osman, Mustafa Çelebi b. Osman, es-Seyyid Mehmed Efendi b. Abdülkādir, Mustafa Çelebi b. Cafer, el-Hâc Yusuf b. Himmet, Receb Çelebi b. Edhem, Dilâver b. Abdullah, Mehmed Çelebi b. Mustafa, Yusuf Çelebi b. Mehmed el-münâdî, Mehmed Çelebi b. Hüseyin el-münâdî ve gayruhüm mine’l-hâzırîn.