İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 310 Hüküm no: 291 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed’in Ali Beşe b. Hüseyin’den satın aldığı câriyenin önceden hastalıklı olduğu için iadesi Mahmiye-i İstanbul’da Ali Paşa-yı Atîk mahallesi sâkinlerinden bâ‘is-i hâze’l-kitâb Mehmed Çelebi b. Ahmed nâm kimesne meclis-i şer‘-i şerîfde Ali Beşe b. Hüseyin nâm kimesne mahzarında üzerine da‘vâ ve takrîr-i kelâm edip târih-i kitâbdan yedi gün mukaddem mezbûr Ali Beşe işbu orta boylu açık kaşlı sarı ala gözlü Rûsiyyetü’l-asl Belkıs bt. Abdullah nâm câriyeyi yüz on beş guruş semen-i makbûza bana bey‘ ve teslîm ben dahi iştirâ ve tesellüm etmiş idim lâkin mevsûfe-i mezbûre verem-i rahm ve sürre marazlarına mübtelâ ve musîbe olup aybân-ı mezbûrân kable’l-bey‘ bâyi‘-i mezbûr yanında mevcûdân ve kadîmân olmağla mezbûr Ali Beşe’ye suâl olunup mevsûfe-i mezbûreyi yedimden kabza ve semen-i mezbûru bana red ve teslîme tenbîh olunmak matlûbumdur dedikde aybân-ı mezbûrân etıbbâya mürâca‘at ile ma‘lûme olan uyûbdan olmağla teveccüh-i husûmet için mevsûfe-i mezbûre taraf-ı şehriyârîden ehl-i hibre ta‘yîn olup etıbbâdan olan Mehmed Efendi b. Mustafa nâm kimesnelere irâ’et olundukda anlar dahi ba‘de’n-nazar mevsûfe-i mezbûre aybân-ı mezbûrân ile elân mu‘ayyebe olduğunu haber vermeleri ile mezbûr Ali Beşe’ye suâl olundukda ol dahi cevâbında mevsûfe-i mezbûreyi müdde‘î-i mezbûre semen-i mezbûre bey‘ ve teslîm ve kabz-ı semen eylediğini ikrâr, lâkin aybân-ı mezbûrân kable’l-bey‘ mevcûd ve kadîm olduğunu inkâr etmekle müdde‘î-i mezbûrdan aybân-ı mezbûrânın kıdemine beyyine taleb olundukda mezbûrân Mehmed Efendi ve Abdullah Efendi li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûfe-i mezbûrenin ayb-ı mezbûrları bir aydan ekalde hâdis olur değildir kadîmdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince mevsûfe-i mezbûre câriyeyi kabza ve semen-i mezbûru müdde‘î-i mezbûra edâ ve teslîme mezbûr Ali Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Mehmed Çelebi b. Ahmed, Ebûbekir b. Hüseyin, Ali b. Abdullah ve gayruhüm mine’l-hâzırîn.