İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 319 Hüküm no: 302 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Karabaş Şeyh Ahmed Vakfı mütevelliliğine Mehmed Efendi b. Ahmed’in tayin olunduğu Mahmiye-i İstanbul’da Ali Paşa-yı Atîk mahallesinde sâkine Fâtıma bt. Karabaş Şeyh Ahmed nâm sâhibü’l-hayrın vakfı olan bir Mushaf-ı şerîf ile mahalle-i mezbûrede vâki‘ üç tarafdan Zeyrekzâde Esad Efendi mülkü ve bir tarafdan tarîk-i âm ile mahdûd olup vakfiye-i ma‘mûlün-bihâsında şart ve ta‘yîn eylediği vech üzre kezâlik vakfı olan bir bâb tahtânî oda ve bir sofa ve bi’r-i mâ ve cüneyne ve kenîfi müştemil menzilin mütevellîsi olmamağla, kıbel-i şer‘-i şerîfden bir mütevellî nasb ve ta‘yîn olunmak ehem ve elzem ve mahalle-i mezbûre imâmı olup meşrûtun-lehimden râfi‘ü’l-kitâb Mehmed Efendi b. Ahmed nâm kimesne her vechile tevliyyete ehil ve uhdesinden gelmeğe kemâ-yenbağī kādir olduğu müte‘ayyin olmağla mezbûr Mehmed Efendi vâkıfe-i mezbûrenin ber vech-i muharrer vakfı olan mârrü’z-zikr Mushaf-ı şerîf ile menzil-i mahdûd-ı mezkûra kıbel-i şer‘-i enverden hasbî mütevellî nasb ve ta‘yîn olundukda ol dahi tevliyyet-i mezkûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Saferi’l-hayr li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, Abdurrahman Efendi b. Süleyman, İbrahim Çelebi b. Ahmed, Abdullah Efendi b. Abdullah ve gayruhüm.