İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 319 Hüküm no: 301 Orijinal metin no: [76b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melkon v. Bahâdır’ın Fâtih Sultan Mehmed evkafı reâyâsından olduğu ve cizyesini vakfa verdiğinin tesbit edildiği Bin seksen altı senesine mahsûb olmak üzre mahmiye-i İstanbul’da Sivas pârekendesi mukāta‘ası re‘âyâsının cizyelerini cem‘a me’mûr olan Ahmed Ağa nâm kimesne tarafından husûs-ı âti’l-beyâna vekîl oldukları ber nehc-i şer‘î üzre sâbit olan Raci? Aleksan v. Şam ve Safer v. Bedros nâm zimmîler meclis-i şer‘-i şerîfde râfi‘ hâze’l-kitâb Melkon v. Bahadır nâm zimmî mahzarında üzerine da‘vâ ve takrîr-i kelâm edip mezbûr Melkon’un kendi ismi ve babası ismi mukāta‘a-i mezbûre defterinde mastûr ve mukayyed olmağla mezbûr Melkon mukāta‘a-i mezbûrenin defterlü re‘âyâsından iken sene-i mezbûrede üzerine edâsı lâzım gelen beş esedî guruş cizyesini bize edâdan imtinâ‘ eder hâlâ mezbûr Melkon’a suâl olunup sene-i mezbûrda üzerine edâsı lâzım gelen beş guruş cizyesini bize teslîme tenbîh olunmak matlûbumuzdur dediklerinde gıbbe’s-suâl mezbûr Melkon cevâbında ben mukāta‘a-i mezbûre re‘âyâsından olmayıp, merhûm Ebü’l-feth Sultan Mehmed Hân evkāfının defterlü re‘âyâsından olup üzerime edâsı lâzım gelen cizyeyi evkāf-ı mezbûre mütevellîlerine edâ edip ve ismim defter-i evkāf-ı mezbûrede mastûr olduğu derkenâr olunmağla âhardan kimesne cizye talebiyle beni rencîde etmemek bâbında yedime emr-i şerîfi sultânî dahi ihsân olunmuşdur deyû tuğrâ-yı garrâ-yı sultânî ile mücellâ bir kıt‘a emr-i şerîf ibrâz edip ve mezbûr Melkon’un ismi mukāta‘a-i mezbûrenin defterlü re‘âyâsından olduğuna müdde‘iyân-ı mezbûrânın yedlerinde sûret-i defter-i hâkānî dahi olmamağla müdde‘iyân-ı mezbûrân ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Çelebi b. Abdullah kethüdâ-yı muhzırân, İbrahim Çelebi b. Mehmed, Ebûbekir b. Mehmed, Hüseyin b. Mehmed, Mehmed b. Mehmed, Osman Beşe b. el-Hâc Ömer, Mustafa Beşe b. Veli ve gayruhüm.