İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 320 Hüküm no: 304 Orijinal metin no: [77a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaş v. Drako’nun borcuna karşılık menzilini Mehmed b. Sefer’e rehin verdiği Mahmiye-i İstanbul’da Çakır Ağa mahallesinde sâkin Tanaş v. Drako nâm zimmî meclis-i şer‘de, bâ‘is-i hâze’l-kitâb Mehmed b. Sefer nâm kimesne mahzarında ikrâr ve takrîr-i kelâm edip mezbûr Mehmed kırk esedî guruşu bana ikrâz ve teslîm ben dahi istikrâz ve kabz ve tesellüm ettiğimden sonra mukābelesinde mahalle-i mezbûr[d]a vâki‘ bir tarafdan ba‘zan el-Hâc İsmail mülkü ve ba‘zan imâma meşrût vakıf menzil ve bir tarafdan Paroh nâm nasrâniye mülkü ve bir tarafdan tarîk-i hâs ve bir tarafdan tarîk-i âm ile mahdûd bir bâb tahtânî oda ve kenîf ve havluyu [77b] müştemil mülk menzilimi, mezbûr Mehmed rehin vaz‘ ve teslîm ol dahi irtihân ve kabz ve tesellüm eyledi dedikde gıbbe’t-tasdîki’ş-şer‘î mezbûr Tanaş’ın babası Kirako v. Kosta ile Kostantin v. Nikola nâm zimmîler meblağ-ı mezbûr kırk esedî guruşa her biri emir ve kabûlü hâviye kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’s-sâlis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Yahya Efendi el-İmâm, Mehmed Efendi b. Mehmed, İbrahim Çelebi b. Mehmed, Veli Beşe el-Muhzır, Mehmed Ağa kethüdâ-yı muhzırân ve gayruhüm mine’l-hâzırîn.